Leve Lesers,

dit Heft is wat dicker worrn. Dat liggt nich blots – man doch ton groten Deel – an dat Klaus-Groth-Johr. Uns Vereen un uns Heft heet jo jüst so as dat Book, mit dat Klaus Groth merren in dat 19. Johrhunnert wiest hett, dat Plattdüütsch en Literaturspraak ween kann. Nich, dat vörher nüms op Platt riemelt hett – man nüms mit so veel Geföhl för Spraak un Poesie, nüms op dat Niveau von de hochdüütschen Dichters. Klaus Groth mit sien Lyrik un Fritz Reuter mit siene groden Romane hebbt uns Spraak en Würd geven, de se vör jem nich hatt hett. Dorüm also de Rubrik »Klaus-Groth-Johr« mit interessante Texten, sünnerlich mit en Vördrag över dat Mitenanner von Brahms, Groth, Jenner un Storm. Wat meenst du? Jenner is di nich bekannt? Maakt nix: Du warrst em kennenlehren.

Un noch en nee’e Rubrik hebbt wi in dit Heft – »Fundsaken«. Dor finnt ji en Rövergeschicht för all, de an Religion un Spraakgeschicht intresseert sünd. Wat wi disse Rubrik anners noch bruukt, hangt dorvon af, wat uns Fundsaken in de Hannen fallt, de wi in uns anner Rubriken nich goot ünnerbringen köönt.

Nich blots Klaus Groth is vör tweehunnert Johr op de Welt kamen – ook Theodor Fontane. Dorüm geiht de Brannenborger Hans-Eckard Sternberg de Fraag na, wat Fontane en Plattsnacker weer – denn för de Anter langt jo nich de Henwies op Herrn von Ribbecks Fraag: »Junge, wiste ’ne Beer?«

In de Rubrik »Literatur« finnt ji Texte op un över Platt, man ook en poor Gedichte von Guschen J. Heitmann, de dit Johr sturven is, von Peter Schütt, de fraagt »Wo geiht dat na güntsiet?«, en soziologisch interessante Geschicht von Kena Hüsers, nadenkern Geschichten von Frenz Bertram un en Leed von Bert C. Biehl. Sett jo kommood hen un leest, sinneert, freit oder wunnert jo.

Natürlich gifft dat as jümmer Rezensionen, Berichte över de plattdüütsche Welt, Radels för de Lütten un »dat Letzt« ton Smustern un Nadenken.

Un nich vergeten: Achtern staht uns Mail-Adressen. Dorhen köönt ji uns schrieven, wat jo freit oder argert oder wunnert hett.

Ick bedank mi bi all de Bidrägers un bi Sonja un Heiko för ehr besünner Ünnerstütten.

Bolko Bullerdiek

Heft Artikel von: Bullerdiek, Bolko