Dat Hochtiedskleed
Hochtied in witt för de Bruut un in swatt för den Brögam orer in Jeans för dat Poor – üm disse Foog dreih sik dat in „Dat Hochtiedskleed“. Schreben hett de Komedie Hans Peter Renfranz. Konrad Hansen hett se in de plattdüütsche Sprook öbersett un Arne Kloodt hett bi de „Niederdeutsche Volksbühne Geesthacht “ (NVG) Regie föhrt.
Dat geiht in de Tiet vör üm un bi 30 Johr üm den Striet vun de Generatschon’n: Hansi Groth (Marcel Jammer) un sein Bruut Wiebke Petersen (Annika Petersen) wullt de Hochtied modern ahn Brimborium. Doch de Huusdragen Oma, Anna Thöming (Marianne Kurtz), wull dat „so as dat jümmer in uns Familie weer“ hebben. Dat meent ok de Müdder vun de Bruutlüüd, Trina Petersen (Christine Kasch) un Frauke Groth (Anja Murawski), de ehrn Söhn alleen groot mokt hett. Dat witte Bruutkleed liggt al parot. As de öllern Fruunslüüd Wiebke dat Kleed öber ehr T-Shirt un Jeans öbertrecken, kriggt Hansi de Bruut in dissen Optoog to sehn. Groten Schreck bi de Fruunslüüs, Hansi sein Kummentor: „So süht se ut as een utstoppt Gos.“ – Veel Bifall ut dat Premerenpublikum för de Reaktschon vun de Speelers in disse Szen’n –
Un denn is dor noch Unkel Herbert Beck (Dieter Wondruschka), den se bi de Füürwehr rutsmeten hebbt – he seggt ober „blots beurlaubt“ – wiel he in een Insatz verkehrt reageert hett. Dat hett ober sien Leev to de Füürwehr nich lütter warrn loten. He leevt wieder för „sien“ Füürwehr. Un denn passeert dat, dat Herbert bi een Füür in’t Dörp twee Kinner ut dat brennend Huus rett. He is de grote Held – nich blots för Frauke.
Un jümmer wedder wull Oma Anna tokieken, dat se de Fier för de Hochtied, de se exakt ploont hett mit Gäst, Festeten un allens, wat dorto sein mutt.
Good twee Stünnen to’n Lachen in dat „kleines Theater Schillerstraße“ (kTS) in Geesthacht gifft dat noch freedags 8., 21. un 28. April un an’n 4. un 5. Mai, jümmer obends Klock acht, an’n 9., 22. un 29. April nohmiddags Klock fief un toletzt an’n Sünnobend, 6. Mai Klock dree, op e Bühn in de Schillerstraße 33 in Geesthacht to sehn.
För den Harvst plont de NVG de Komedie „Nix as Kuddelmuddel“ vun Jürgen Hörner, Plattdüütsch vun Kay Carius. Premier is an’n 30. Harvstmaand (September) in’t kTS.
www.nvbg.de
Dat Hochtiedskleed, Komödie von Hans Peter Renfranz, Niederdeutsch von Konrad Hansen. Niederdeutsche Volksbühne Geesthacht e. V. von 1919. Regie: Arne Kloodt. Premiere 1. April, neun weitere Aufführungen.
Heft Artikel von: von Essen, Peter