narms duller her as oppe Wilt, meent Grete Hoops. In eer veerteintet Book siet 2002 het se up rund söbentig Sieden afsünnerlich Geschichten upschreben. To´n Bispill de vun de beiden footballverrückten Mannslüüd, de ook an´n Konfirmationsdag vun eer Döchter speelen wöllt. De Anpfiff ward extra rutnödelt,  man de Pastersch het noch mehr Tied. –  Orer,  ook  wenn  bi´d swemmen in´n See de Slötel verschütt gaht, kriegt een de grote Party up de Reeg.

Grete Hoops schrifft öber de Kinnerteid „vun den lütten Felix“ bet hen to old wardn un Demenz, öber Noberschaft un Familienbande. Allens Themen, wo all veel öber schreben worrn is, man jüst dit noch nich. Besünners is ook de Oort sik uttodrücken. Grete Hoops schrifft as bi ehr to Huus snackt ward, in nordöstlichet Neddersassen, nich no Sass orer anner Regeln. Een bruukt Fantasie üm dat kloor to kriegen. De fief Sieden met Word verkloorn sünd nödig, wiel dor veele regionale Seggwiesen bruukt sünd. Man ik heff ook Wöör „wedderfunnen“, de ik all langen nich mehr hört heff.

Bi de een un anner Geschicht ward to wied utholt, bet dat up´n Punkt koomt. Dat is as een dat vertellen deit: du kinnst doch dann, de weer doch dor un dor,  met de un de,  un denn… . Wenn een noog Gedüür het, is dit Book denn doch ´n beten „to´n Högen“, as dat in´n Ünnertitel heten deit.

Grete Hoops, Dat geiht doch narms duller her as oppe Wilt, Isensee Verlag Oldenburg, ISBN 978-3-7308-1307-2

Heft Artikel von: Twenhöfel, Christl