Ein Mammut, dat in ein Fåmilie lävt! Dat dücht mi bannig interessant. Ein Kinnerbauk von Gesine Wanke, fein œwersett von Ingrid Straumer mit Biller von Heidrun Schlieker. De Teiknungen sünd beten anners, as‘n dat kennen deit von Heidrun Schlieker ehre Billerbäukers för Lütte. Schwatt-witte Vignetten, wo dat Mammut nüdlich œwer de Sieden purzeln deit. Jedein von de teihn Kapitel fangt mit so‘n schwatt-witten Mammutstriepen an. Dortau gifft dat noch teihn bunte Kinner-Biller œwer ‘ne heile Sied. Båbentau Utmålbiller, de de lütten Läserdierns un -jungs upföddern, dat Mammut antaumålen. Dat kiekt nüdlich un truschüllig in uns Ogen.
Dat 39 Zentimeters grote Mammut lävt tauierst in‘n Zoo, wo em dat nich gefallen deit. Dat klappt, dat dit lütte Dier utneihen kann von dor. Hei mach in ein Fåmilie läben un Frünn‘ finnen, de Gummistäwel drägen. Dat de besünners fründlich sien sallen, hett dat Mammut von ein Pony liehrt. All Diere in de Geschichten kœnen schnacken un ünner sik Ünnerhollungen führen. Man uns lütt Mammut nich, dat secht blot „Öpf“. Schad‘ eigentlich.
Dat sünnerbore Veih dröppt Mia un ehre Mudder, löppt achteran un kladdert dörch dat Kinnerstubenfinster midden rin in de Fåmilie Hansen: Mudder Ingenieurin, Vadder Archäolog‘, twei Kinner: Mia un Dominik. Sei sünd gråd in ein Hus treckt, dat gifft ne gräsige Nåwersfru un ‘ne äbenso gräsige Tant, de Ottilie heit. Süss is allens heil normål. Dat Mammut kümmt in disse Fåmilie, wo de Kinner tau Schaul gåhn, de Öllern arbeiten un all sik tau Ferien, Wochenennen un Wihnachten freuden.
Nå ein lütt bäten Rummel tau’n Anfang, as de Mama dat Mammut in Mia ehre Stuf finnen deit, wart allens organisiert, dat dat Mammut ok tau dat normåle Minschenläben passen deit: Dat geiht nå Hunnenschaul, måkt denn „Begleitmammutschien“, liehrt, stubenrein tau sien, an de Lien tau lopen, Gras von de Wisch tau fräten, kann Fautball spälen un sik ortig benähmen, wenn Tanten Ottilie tau Besäuk kümmt. Allens löppt nå Plån, dat lütte Mammut passt sik åhn Klågen an allens an. Af un an kiekt de Verteller in denn Dassel von dat Mammut rin un kann de jungen Läsers verråden, wat Mammut Hansen denken deit, wat em komisch vörkümmt. Tau‘n Bispill is hei de einzig’ in denn Husholl‘ Hansen, de de sik dorœwer wunnert, dat Vadder, Mudder un de Kinner sik ganz un gor verbögen un schauspälern daun, as Tanten Ottilie kümmt. Sei verstellen sik kumplettemang, üm disse Bio-Tant, de Klaukschietersch von‘n Deinst, allens recht tau måken. Äten, Kauken, Kledååschen – allens ward inricht nå ehren Schmack, ofschonst keinein Ottilien lieden mach, œwer ehr de Meinung nich seggen will. Dor rasselt allens in denn einzigen Konflikt von dit Bauk rin un de Vadder gifft Ottilie bannig bescheid un sett‘ ehr denn Kuffer vör de Dör. Denn gifft dat Pizza bi dat Kieken von de DVD „Ice Age“, wieldat Mammut Hansen disse Geschicht‘ so giern mach.
Un denn kümmt Wihnachten un Husdier Hansen liehrt, denn Wihnachtsmann tau achten un iehren un de Dannentwiegen nich tau fräten. Doch hier höllt sik dat domestizierte Mammut einmål nich an de Rägeln, sünnern gnabbelt ein poor Twiegen von denn Wihnachtsboom af un måkt sik dat ünner‘n Boom kommodig.
Wat ‘ne schöne Idee von Gesine Wanke, ein Minimammut in‘ne Minschenfåmilie tau schicken! Wat dat Best is an‘t Schrieben: Allens kannst‘ erfinnen, as du willst un so wiet dien Fantasie di drägen mach! Un so wart‘ hier dat lütte Mammut in de Welt von hüt bröcht, åhn verkloren tau wullen, worüm orrer wo dat herkümmt. Dat heit blot: „Wunner von de Wetenschop“, basta un los geiht de Geschicht! Dat hett mi gefallen, dat dat dor nich üm geiht. Ok de fein beobacht‘e Natur dörch de Johrestieden wiest, dat Gesine Wanke ok ein von de is, „de noch weit, woans dat Fröhjohr rükt“ orrer wo schön un kommodig dat in ein sülfst buuchte Höhl orrer tau Wihnachten is.
Wat harr Mammut Hansen nich allens beläwen kunnt! Dat harr de Billerbauk-Fåmilie so recht dörcheinannerküseln, beten sturköppsch orrer bengelig sien kunnt un beläwen, wat blot ein lüttet Wunnerdier beläwen kann. Man dat vertellt de Schriewersfru nich. Sünnern Mammut Hansen integriert sik prächtig in denn normålen Olldach bi uns in‘n Nuurden un ward tau ein Mustermammut. Ein Bericht an‘n Schluss nå de Hunnert-Sieden-Geschicht vertellt dat noch eins amtlich.
Dat finn‘t fürwiss all de Kinner un Öllern, de dat läsen orrer vörläsen mœgen, so as Millionen von Kinner, de mit all de välen Conni-Bäuker (Carlsen) denn Olldach entdecken daun un ehre Conni von Liane Schneider bannig leif hebben.
Kann angåhn, dat de Schnack, weckern ik so giern mach: „Wäs Pippi, nich Annika!“, hüt aflöst ward dörch ein Lengen nå miehr von disse schönen, lütten, normålen Såken, de dat viellicht nich miehr soväl gifft: Vierköppig‘ Fåmilien, åhn Patchwork un anner Problemen, mit‘n Hus, Gorden un so wieder. Blots, dat sei keinen „langwieligen Hund“ hebben as Ann-Sophie ut Mia ehre Klass, sünnern ein Mammut.
Gesine Wanke: »Mammut Hansen leevt nich in’n Zoo«, Plattdüütsch von Ingrid Straumer, Biller von Heidrun Schlieker, Hamburg 2019: Quickborn-Verlag
Heft Artikel von: Bliemel, Susanne