Een laadt en Hand vull junge Musikers ut Noorddüütschland un en Hand vull Musikers ut Drenthe in’e Nedderlannen tohoop för en Wekenenn no Plön in. Woans snackt de mitnanner? – Plattdüütsch! Un wat is dorbi rutsuert? – En wunnerboren plattdüütschen Song doröver, dat een in’t Leven faken nich noog kriegen kann: „Ik will mehr“. So leep dat tominnst bi dat Projekt „Platt together“ vun’t Zentrum för Nedderdüütsch in Holsteen (ZfN) un de Stichting REUR ut Drenthe. Dorbi weern ut Düütschland Miriam Buthmann un Malte Müller vun’e Tüdelband, Pascal Bahr, Joachim Südekum un Tim Sünram, de all dree 2018 bi den Bandwettstriet Plattbeats vun’t ZfN mitmookt harrn, un de Musiker Jan Marxen. Ut Drenthe kemen Marsha Boes, Lilian van Lottum, de al op den tweten Platz vun en plattdüütschen Songcontest in Drenthe komen weer, Harmen Boels, Erik Koerts un Robin Muilwijk, de 2018 to de Winner vun’t Drèents Liedtiesfestival höör. Dat musikaalsche Leit för düsse Grupp harr Bert Kamping. Vunwegen de Spraak geev dat Stütt vun den Baas vun’t ZfN Thorsten Börnsen, de ok dat Drepen vun’n 23. bet 25. November 2018 op’n Koppelsbarg in Plön organiseert harr.

Woans de Deelnehmers mitnanner snacken, weer teemlich gau kloor west, vertell mi Pascal, de verleden Johr mit sien Band »Standbild« bi Plattbeats wunnen harr. En poor Lüüd snacken Hoochdüütsch, en poor Holländsch, welk kunnen ok good Ingelsch, man Platt kunnen se all. Ofschoonst dat „Dreents“ anners utsnackt warrt, as dat Platt, dat wi kennt, harr dat Snacken mitnanner heel goot slumpt. Wenn mol en Woort fehl, harrn se eenfach dat Woort ut de Mudderspraak nohmen un denn müssen Gestik un Mimik hölpen.

Vörgaven geev dat eerstmol keen, nich mol, wat dat een Song oder mehrere warrn schullen. No’t Vörstellen harrn se eenfach eerstmal tohoop Musik mookt, „gejamt“ nööm he dat. So kunnen se rutfinnen, keen mit keen op’t best tosomenarbeiden kunn. Dor weern jo heel verscheden Musikrichten bi as Punk, Hip-Hop, Pop un Rock un Singersongwriter. Pascal harr sik denn mit Lilian un Marsha tohoopsett un se harrn an den Refrain arbeidt. Dorbi weer ok de Idee för dat Thema un den Text opkomen. Nodem Pascal ok noch sien Strophe schreven harr, harrn se dat de annern vörstellt un no kotte Tiet weern sik all eenig, se wullen alltohoop een Song moken. Denn worrn de annern Delen vun’n Text schreven un de Musik dorto utdacht. Malte, Jan un Robin harrn sik tohoop bet laat in’e Nacht mit de Musik un den Insatz vun de Instrumenten befaat. An‘n letzten Dag hebbt se de Opnohmen mookt. Jeedeen hett sien Stremel insungen un de dree Jungs hebbt dat denn allens tohoopmischt un op Schick bröcht. So is dor en grootordigen Song bi rutsuert, in den heel verscheden Musikers mit jümehr egen Stil un Musikrichten to en grote Eenheit tohoopkaamt. En würklich runne Saak, de di nich so gau wedder ut’t Ohr geiht. An’n 15. Märzmaand 2019 hebbt se den Song in’t Lanneshuus vun’e Provinz Drenthe in Assen präsenteert. Hier is de Text:

SONGTEXT „IK WILL MEHR“

Lilian:
Want ik wil meer
gebeurt mie keer op keer
Wil zoveul meer
Dit is gien leven meer
Wat mis ik toch?
Ach, ik heb nooit genog
Oh, ik wil meer
Gebeurt mie aalsmor weer

Pascal:
Wedder en Dag  – egens is he wunnerschöön
Ik fohr mit Rad op de Straat, kann de Landshop sehn.
Schull glücklich ween, dat dat allens hier sien Sinn hett,
Ik kiek na rechts un warr gewöhr, dat ik doch nix heff.

Bün ünnerwegens mit mien jüst köffte Ford,
Ik heff de Theorie vun‘t Glück graad opbohrt.
Een överhaalt mi mit sien blitzniet Cayenne,
Will ik ok geern hebben, man ik heff doch keen Penn

Marsha:
Wij kiekt altied wat een aander hef
Mar as je nou ies even kiekt naor wie der bij je blef
En aj je nou een keertie daankbaar doet
Dan denk ie ok daj je elke keer wat neiers moet
Der bint der ok die het met minder doet
En ok al bint die dan misschien toch wal een eindtie vort
Mar, aj je nou een keertie daankbaar doet
Dan ziej ie daj je ja niet elke keer wat neiers moet

Tim:
Un de dor baven, de all allens hebbt, de treckt noch mehr tosamen,
un de, de üm de Krümels knappst, schüllt um de auch noch bangen.
Dat weer all jümmer so un so schall dat jümmer sien,
de een de is de Slachter un de anner is dat Swien

Joachim (Rap):
Ik will mehr as min lief afkann
un weet ik bruuk n beten afstand
de Wirtschop het min Bregen to Schannen mokt
de Gedanken sünd platt as ’n Pannkoken
de Sööt sünd, ik will noch een eten
Heff keen Dösch, doch drink noch n beten
bün nich tofreeden mit de Situaschoon
man heff ik allens dubbelt, ward allens good
löppt dat nich, mok ik wieder
löppt dat good, mok ik wieder
heff keen Pust, aver mok keen Puus
heff ik een Wahnen, will ik een Huus
heff ik een Huus, will ik een Slott köpen
blots nich op de egen Kopp töven
krigg nich noch aver faken to veel
man nehm mi de Tied üm in Gaarden to speeln

Mire:
Ik will doch egentlich de lütten Saken sehn
Un jeden Ogenblick en Pries verlehn
Ik heff dat jümmer wedder probeert
Wenn du mi fraagst, wat ik will un wat ik bruuk,
Denn segg ik di, dat du mi tohöörst is al noog
Üm all dat annere heff ik mi al  veel to lang üm scheert.

Oh, ik will mehr, passeert mi jümmers weer,
Will allens so sehr, dat is keen Leven mehr.
Wat drifft mi dull? Ik krigg den Hals nich full.
Oh, ik will mehr, passeert mi jümmers weer,

Harmen:
Ik heb nooit echt in mijzölf geleufd
‘k vuul mij verlamd, ‘k vuul mij verdeufd
Nooit tevreden en nooit genog
Mar misschien komt dat later nog

Pascal:
Ja, ik heff nich öft an mi glöövt
Dat hett mi allens vun binnen utdröögt
Weer nie tofreden mit mien Kraam
Man villicht schafft wi dat tosomen.

Anhören kann een sik den Song in’t Nett op Youtube.

Föddert wörr dat Projekt vun de EU in’n Rahmen vun’t European Culture Heritage Year (ECHY), dat Johr vun’t europäisch Kultuurarv. Dor warrt sünnerlich Vermaak op Projekten richt, de över Lannesgrenzen weg gaht. Al mit de Europäisch Charta för Regional- un Minnerheitenspraken is klor worrn, dat Europa för Schuul un Föddern vun’e „lütten“ Spraken en grote Rull speelt. För Thorsten Börnsen is dat dorwegen heel wichtig, dat se dör plattdüütsche Projekten as düt en europäisch Verbinnen henkriegt. Villicht kunnen plattdüütsche Bands denn mol nich blots no Holland man ok no Korsika oder no’t Baskenland reisen. „Mit Plattdüütsch bliffst du even nich tohuus sitten, sünnern du kümmst dormit üm’e Welt!“, sä he bi’n NDR. In‘e Tokunft schall de Tosomenarbeid vun’e Regionen Holsteen un Drenthe wat plattdüütsche Kultuuranbotten vun un för junge Lüüd angeiht noch utbuut warrn. Dor dörvt wi uns wiss op noch mehr interessante un spannende Projekten freien.

Dat dat Wekenenn in Plöön all Deelnehmers bannig Spooß mookt hett, kann een op de lütten Videofilms sehen un hören. Thorsten Börnsen weer sülvst heel ut de Tüüt vun sien Projekt. „Dat weer’n richtige Knaller!“ weer sien Kommentor in’t Video.

Heel velen Dank an Pascal un Mire för de Informatschonen!

Fotos
boven: Malte Müller,  Robin Muilwijk (links boven), Erik Koerts (links ünnen), Mire Buthmann
ünnen: Tim Sünram, Mire Buthmann (boven), Pascal Bahr, Jan Marxen, Malte Müller
All Fotos: Platt together

Heft Artikel von: Kücklich, Petra