Dat is en Lederbiller(vör)leeswöörlehrverkloorbook, dat Book „Plattkinner“ vun Wiebke Colmorgen un Hardy Kayser mit Billers vun Tanja Esch. Dor kannst du wirklich allens mit moken. Un en feine CD is dor ok noch bi. Fangt wi mol bi de Leders an. Egens mutt een dor Songs to seggen. Denn de mehrsten gaht al orrig flott loos, se laadt to’t Rögen in un männicheen hett al bi’t eerste Heuren Ohrwurmpotential. Dor sünd heel verscheden Musikrichten as Folk, Blues un Rock in to finnen. Teihn Songs sünd in dat Book binnen mit Text un Noten. De Texten hett Wiebke Colmorgen schreven, de Musik dorto Hardy Kayser. De hett al mit Ina Müller un Anett Louisan warkt. De Songs kannst di op de CD anheuren man ok sülvst singen, op‘t best mit en Koppel Kinner tohoop. No de Noten kannst dorto ok Gitarre oder en anner Instrument spelen. Man op de CD sünd ok all Leder nochmol as Karaoke-Version op, ahn Gesang to’n sülvst mitsingen. Ik finn dat teemlich vigeliensch, dor den richtigen Insatz faattokriegen, man de mehrsten Lüüd warrt sik dor sachts musikoolscher anstellen as ik, Kinner so as so. Un een kann de Musik ok so heel goot heuren.
Dat ok all weet, wat se dor singt, gifft dat to jeedeen Ledertext en hoochdüütsche Översetten. Dorbinnen sünd denn enkelte Wöör markeert un düsse Wöör dükert op de neegste Siet denn op Platt wedder op, verkloort dör en charmante Teknung vun Tanja Esch. Lütte Biller, in root tekent, wiest blots dat, wo dat op ankümmt. So süht een foorts, wat meent is. Dree Hannen mit een, twee un dree utstreckte Fingers verkloort dat Woort ‚tellen‘. ‚Buten‘ löppt een mit’n Draken un ‚binnen‘ liggt een op’t Sofa. Klor, oder? So kann een mit dütt Book blangenbi ok en Barg plattdüütsche Wöör lehren. In’e Mitt vun so’n Verkloorsiet steiht denn jümmers en kotten Text över jichtenswat, wat een as Noorddüütschen so weten schull: Wat Plattdüütsch egens nipp un nau is, wat dat mit dat Tüdelband op sik hett, wat Swattsuer is un wat dat noch för typisch noorddüütsche Gerichte gifft, wat’n ‚fixen Dutt‘ is oder dat een op Platt ok mol ‚So’n Schiet!‘ ropen dörv. Mit poor Sätz op’n Punkt bröcht. Dat mookt al Spooß, sik dat dörtolesen un de Billers antokieken. To jeedeen Song hett Tanja Esch, de ehr Teknungen wi al ut ehr Book ‚so un annersrüm – Das kleine Hamburg-Buch der Gegensätze‘ kennt, noch en buntet Bild tekent. An Klören hett se dorför blots en gode Hand vull bruukt, man op de Billers is orrig wat loos. Dor is foken en Barg Lüüd op togang, Kinner bi’t Spelen, bi’t Eten oder in’e School. Männich no Oort vun en Wimmelbild, dat du di lang ankieken kannst un jümmers noch wat Nieget finnst. So kann een dat Book ok as Billerbook bruken, tohoop mit lütte Kinner ankieken un doröver snacken, wat’t allens to sehn gifft. Op’t best op Platt.
De Ideen för de Texte hett Wiebke Colmorgen ut ehr Arbeid in’n Kinnergoorn un Lesungen in Scholen, dör ehrn Söhn un ut ehr egen Kinnertiet sammelt. Dor gifft’t dat en Song över’t Plattsnacken, över’t Eten, över den ‚Mann in’e Tünn‘ un ‚Silke Snappsnuut‘, de jümmer en Snööv hett. ‚Wi sünd ut Hamborg un nich ut Zucker‘ mookt ok bi Schietwedder gode Luun, dat een Lust kriggt, ruuttogahn. ‚Ohauerha‘ bekrittelt, dat een sik egolweg över wat bekloogt. In ‚Kiek mal‘ wiest de Kinner, wat se allens köönt. Bi ‚Hein Daddel‘, den Döösbaddel, de beten tüffelig is, man den all Kinner lieden möögt, wiel he sik nich strieden deit, un ‚Klaus Kleckerklümp‘, den de Kinner leev hebbt, ofschoonst he jümmer för Krawall sorgt, geern wat kaputt un lütte Kinner bang mookt, wiest sik, wo tolerant Kinner ween köönt.
Gifft dat ok wat, dat in düt Book fehlt? Jo, dat hett keen Siedentallen! Man dat stöört sachts blots de groten Lüüd. Düt Book is op so vele Oorden to bruken, föhrt Kinner locker un mit Spooß an de plattdüütsche Sprook ran, dat heurt no mien Menen in jeedeen Kinnergoorn un jeedeen Grundschool in’n Noorden, sünnerlich in Hamborg, man is ok en goot Investition oder Geschenk för junge Familien, de en beten Vermaak an’t Noorddüütsche hebbt. Un dat is jo ok nich ümsünst dat Plattdüütsch Book vun’t Johr 2018 worrn.
Wiebke Colmorgen/Hardy Kayser/Tanja Esch: Plattkinner – Neue plattdeutsche Songs für Hamburg und den Norden, Hamburg, Junius Verlag 2018, 48 S., Hardcover mit zahlreichen Farbillustrationen und beigelegter CD, ISBN 978-3-96060-501-0
Heft Artikel von: Kücklich, Petra