Ünner dat Motto Platt twischen Punk un Poetry harr Thorsten Börnsen, Baas vun’t Plattdüütschzentrum Holsteen un Organisator vun den Bandwettstriet Plattbeats, an’n 19. Oktober 2019 in „Die Pumpe“ in Kiel inlaadt, den Optakt vun Plattbeats 2020 to fiern.

Vunwegen sien 200. Geburtsdag schull dat togliek ok üm den groten plattdüütschen Dichtersmann Klaus Groth gahn.

No en kott Begröten geev Thorsten Börnsen en Utblick op den Avend un verkloor lütt beten wat to Klaus Groth.

Thorsten Börnsen begrött sien Gäst

Punk hett dat nich geven man feinen Plattpop vun „Die Tüdelband“, de Thorsten Börnsen as „Urgestein“ vörstell. Se sünd nu al siet teihn Johren mit jümehr plattdüütsche Popmusik ünnerwegens. As Mire mi vertell, is ok en niege CD al in Arbeid. Se ümrahmen dat Programm ünner annern mit Leders vun jümehr CD „Ganz Goot“ as „Blots wi twee“ un „Gliek“.

 

Die Tüdelband

 

Thorsten Börnsen stell en interessanten Vergliek an twischen den amerikaanschen Regisseur un Dreihbookschriever David Lynch un den sien Film „Lost Highway“, rutkomen 1997, un en Reeg Gedichten in Klaus Groth sien „Quickborn“. So vermengeleer sik in de Groth-Gedichten „Dat stöhnt in’t Moor“, „He wak“, „To Bett“ un ok in’e drüdde Strophe vun „Mien Jehann“ jüstso as in den Film Wunsch- oder Alpdrööm un Inbillen mit de Wirklichkeit, dat de Slagsiet kriggt un een sien Sinnen nich mehr truen, sik op de Wohrheit nich verlaten kann. Jüst düsse verscheden Perspektiven mookt för em de Deepte vun Dichtung oder Film ut, dat se wieder wirkt, ok wenn se al lang toenn sünd.

Thorsten Börnsen

De Rapper Joachim Südekum as LPP 143 hett “De Slacht bi Hemmingsted” as Rap vördregen, sachts en Weltpremiere.

 

Joachim Südekum

 

Nikos Saul präsenteer inspireert vun Klaus Groth sien Quickborn egen Gedichten un PoetrySlam-Texten. Un he funn in Klaus Groth sien Gedicht „Grotmoder“ sogor swatten Humor.

Nikos Saul

En besünner Vertonen vun Klaus Groth sien „Abendfreden“ präsenteer Jan Marxsen. He ünnerleeg dat vun Lornz Lorenzen insnackte Gedicht mit Ambient Music vun sien elektroonsch Klaveer. Dat wiest, een kann den Text ok anners präsenteern as sungen vun en Bült Mannslüüd in’n Shantychor, meen Thorsten Börnsen.

Jan Marxsen

 

To’n Sluss rööp Thorsten Börnsen all twüschen 15 un 30, de en Band hebbt un Musik mookt, op, sik bi Plattbeats to bewarven. För dat Plattdüütsch hebbt se en „Plattmook-Service“. Dat gell de Regel: Op Hoochdüütsch blots en Song, op Platt en Hit! An’n 25. April 2020 seht sik all wedder: bi’t Plattbeats-Finale in’t LOGO in Hamborg.

Mit’n kommodigen Klönsnack mang de Gäst un de Künstlers güng de Avend toenn.

Text un Fotos: Petra Kücklich