Gauner-Komedie vun Tom Müller un Sabine Misiorny

Plattdüütsch vun Renate Wedemeyer

Ohnsorg-Pemiere: 29.8.2020, löppt bit 30.9.2020

Birte Kretschmer (Chantal / Bonnie) un Erkki Hopf (Manni / Clyde), Foto: Oliver Fantitsch

Na dat Corona-Alldicht (lockdown) is dütt nu dat eerst plattdüütsch Stück, dat de Ohnsorgs ünner de Regie vun Frank Grupe op de Been stellt hebbt. Corona hett den Speelplan ümsmeten, man müss anner Stücken söken, Corona-gerechte Stücken. Un „Twee as…“ is so een Stück: Bloots twee Schauspeler un ümmer op Afstand (as de Tokieker ok) un – ahn Paus. Un liekers een lachkitteln Klamauk op den Achtergrund vun een Verbreker-Mythos ut Amerika. De dor fröher Bonnie un Clyde weern Röver un Mörder un kunnen beter as Afschrecken denen denn as Vörbild.

Chantal un Manni sünd de komödiantisch Karikaturen, de in de veel to groten Footstappen vun dat Verbreker-Duo Bonnie un Clyde dorvun dröömt, ganz gau dat grote Geld op de Hand to kriegen un sik denn de Welt to köpen: Hochtied in Las Vegas, Rententied un Olendeel op Hawai. De Bank-Överfall, den se achter sik hebbt, hett ok allerbest klappt. Achteran bi de Flucht hebbt se sik allerdings böös verbiestert un weet nich recht, wo se sünd. Se stiegt in dat Loger vun een Schoh-geschäft in un richt‘ dor ehr Versteck her. Över Radio höört se, dat bi een Bank-Överfall de Verbreker den Beute-Büdel hebbt stahn laten un ut Versehn den Inkööps-Büdel vun een Bankkundin mitnahmen hebbt mit een poor läppisch Levensmiddel. Se wüllt sik utschütten vör Lachen, dat Verbreker so dösig sien köönt. Bit se markt, dat se meent sünd. Un ut den Büdel, ut den Chantal nu de Zig-Dusender trecken will, hoolt se man bloots een poor Dosen för dat Abendeten rut.

Blifft nix, se mööt dat noch mal versöken. Nadem all’ns good bedacht is, is dat jo egens een Kinnerspeel. Man nu geiht all’ns in de Büx. De Strump-Maske, de Chantal em köfft hett, nimmt Manni de Sicht un maakt em blind as he dat Geld verlangen will. Un den blifft bloots noch de Flucht. Un as se denn wedder in ehr Schoh-Versteck sünd, ward afrekent: Wer is denn nu Schuld an den Flopp? – Man denn findt sik dor tofällig een Kuffer, un as se den open maakt, wiest sik, de stammt vun de Konkurrenz-Verbreker. De hebbt dor ehr Versteck hatt. Un dor is denn ok de Büdel mit dat grote Geld. Se sünd an’t End doch noch fündig worden. Avers Geld weckt Gier. Manni will op eenmal nich mehr delen, dat Geld höört doch egens em to. Nu fangt een Katt-un-Muus-Speel an: Wer schafft dat, den annern to övertölpeln. Dat Geld, nu in een Schoh-Karton, ward ümmer wedder woanners verteken. Op’t letzt gript de charmant-naive Chantal sik den richtigen Karton un haut dormit af. Manni glöövt noch, dat sien Karton de mit dat Geld is. Man wieldem, dat he de Schreck-Bitternis vun Denkste slucken mutt, flackert dat Blaulicht dör de Finster un he höört de Opfordern vun de Polizei, dat he opgeven schall un rutkamen. Hett dat naive Luder vun Chantal em opflegen laten?

Dorvun ward nu nix mehr vertellt, denn dat Stück to End. Nich veel Handlung, avers veel un flott Bewegen, allerbest Stimmung ahn överflüssigen Deepgang. Lachmuskel-Training na all den Corona-Eernst: Een Komödianten-Fest, dat de Seel oplockern deit. Birte Kretschmer speelt de Chantal un Erkki Hopf den Manni, un de beiden maakt dat mit veel Lust un Swung, hebbt jo ok beid een Glanzrull.

Heft Artikel von: Denker, Cord