As ik an’n ersten Sünnavend in’n Oktober 2021 dat Hamborger Abendblatt opslah, seh ik veer grode Trueranzeigen, een von de Familie, een von de SPD, een von uns Quickborn-Vereen un een von de Rechtsanwaltskanzlei, in de Rolf-Dieter lang arbeit hett. Dat smitt en Licht op sien Leven, wiest, wo un för wen he wichtig weer.

Wenn de Quickborn-Vörsitter utfallt, meist dör den Dood, denn is dat för den Vereen nich licht, enen Mann oder en Fro för den Job to finnen. As Dirk Römmer ophöör, heff ik Jan un Allemann fraagt, tominnst de, de Platt snacken un mööglichst ok schrieven kunnen, wat se bi uns nich Vörsitter warrn wullen. Ik heff dat Job-Profil in de allerschöönsten Farven maalt. Man nix. De Lüüd wullen nich. Dat is meist nich to glöven.

As ik Rolf-Dieter, den ik ut den plattdüütschen Raat in Hamborg kenn, fraagt heff, weer ik meist verbaast, as he sä, he kunn sik dat vörstellen. So is he 2012 uns Vörsitter worrn.

He is 1945 op de Welt kamen, müss so as veel anner Kinner na den Krieg ohn Vadder opwassen, leev bit 1952 mit sien Mudder in Stendal/Altmark, besöch dor den sozialistischen Kinnergoorn. Sien Mudder is denn mit em över de gröne Grenz in den Westen gahn, hett bi en Groottant in Wilhelmshaven en Ünnerdack funnen. Dor is de lütte Rolf-Dieter in de Grundschool gahn un later in dat Humboldt-Gymnasium.

Dat Plattdüütsche hett he dör sien Grootmudder kennen lehrt, villicht ok noch in Wilhelmshaven op de Straat. Sien Grootmudder hett em Fritz Reuters »Ut mine Franzosentied« vörleest un »Dörchläuchting«. Dat hett em woll dat Hart warmt, man nich de Tung lööst. Dorüm woll sien Interesse an de Spraak, man ok sien Tögern, de Spraak to snacken. Se weer em to wichtig, um se to misshanneln.

As Student hett Rolf-Dieter mit Mathematik un Physik anfungen. Man dat wöör woll op Schoolmesteree oder Forschung rutlopen, dach he un fünn, Jura weer spannender. So hett he umsaddelt.

1979 hett Rolf-Dieter sien Fro Litha freet, en Freifrau zu Knyphausen. Beid hebbt en Söhn un en Dochter. Ok de sünd wedder verfreet un hebbt beid twee Kinner. Rolf weer also veerfach Grootvadder.

Lange Johrn hett he in en grode Hamborger Kanzlei arbeit, later noch in en Bürogemeenschop in de Diekstraat, un sik mit Arbeits- un Familienrecht afgeven un mit dat Recht von de Medien. Wenn in jeeds Heft op de letzte Sied steiht: v.i.S.d.P.: Rolf-Dieter Klooß, denn weer dat för de mehrsten von uns en Formalie, man för Rolf-Dieter weer dat wichtig: He hett jeeds Heft, ehrder dat druckt wöör, in dat pdf-Format leest un sik afsekert, dat tominnst rechtens all op den richtigen Padd weer.

Man Rolf-Dieter weer nich blots Jurist, he weer ok en Hamborger Politiker, hett för de SPD in Hamborg-Mitte dörteihn Johr in de Bezirksversammeln seten, weer Deputierter von de Justizbehöörd un veerteihn Johr Maat von de Hamborger Börgerschop, dor lange ok Vörsitter von den Justiz-Utschuss. Disse politische Arbeit weer natürlich ok för sien Ehrenämter von Vördeel: För em weer keen Döör verslaten. He kunn mit all Lüüd, de in Hamborg wichtig sünd, snacken.

Blangen den Quickborn-Vereen harr he ok noch dat Leit von de Hans-Alvers-Frünnen. Man kann also nich seggen, dat he de Arbeit ut den Weg güng.

Den Kontrabass, den he noch in sien Tübinger Studententied speelt hett, hett he later bisiet leggt un klassische Gitarr speelt. Schaad, ik harr em geern mal toluustert. Man dor is dat nich mehr to kamen. Op sien Rennrad heff ik em noch mal sehn. Truurig, dat em dat nich noch wat länger dör de Tied dragen hett.

Unvermodens is he nu von uns gahn. Wi von’n Quickborn tominnst hebbt nich wüsst, dat he krank weer. Wi truert um em un bedankt uns för allens, wat he för uns Vereen daan hett. Dat is mehr, as de mehrsten sik vörstellt. Wi wünscht sien Fro un Kinner sowie Enkelkinner, dat se eenanner Stütt un Stöön ween köönt un se sik wesselsiedig dör disse swore Tied hölpt.

Bolko Bullerdiek

(Foto: Petra Kücklich)

Heft Artikel von: Bullerdiek, Bolko