Rock op Platt sehn,
schier ut’e Tüüt ween:
Ok in’n Märkenwoold
warrt se oolt!
Man singt, danzt, steppt mit Swung.
Höllt sachts jung.
Op Hoochdüütsch sössunsösstig Johr?
Blots mööd över lachen!
Op Platt warrt dat mit hunnertsöben noch krachen.
Keen en bannig vergnööglichen Avend beleven müch, de is bi Rock op Platt afsluuts richtig.
Sandra Keck hett dor wedder en wunnerboren Mix ut Gesang, Danz un Komedie op Platt tohoopstellt.
Dorbi mutt een över de Qualität vun den Gesang jümmers wedder wunnerwarken. De bruukt vör den Vergliek mit elkeen Musical nich bang ween. Se hebbt sik to de Lüüd vun’t Ohnsorg-Ensemble, de jüst so goot sungen und danzt hebbt, noch Lüüd ut’t Musical-Fack dorto hoolt, so as de Jazzsängersch Anja Mattner, de al in Mamma Mia sungen hett, oder de Musicalsängersch Annabell Mierzwa, de al op verscheden Bühn in Norddüütschland sungen und danzt hett. Man ok bi all de hett dat mit dat Plattdüütsch wunnerbor slumpt. Överhaupt kunn een ok bi de Leders meist jedeen Woort verstohn, wat oftins jo nich so eenfach is, wenn op Platt sungen warrt. De plattdüütschen Texten passt heel goot to all de Pop-Songs un Slagers. Ik wünsch blots, dat se düttmol villicht en CD dorvun moken deen.
In de Geschicht is mennigeen Saak, de hütigendaags so opdükern deit, in’n Märkenwoold inbuut un warrt plinköögsch bekeken. Dor gifft dat in’n Woold en Döner-Stuuv, de de Hex to’n Opbetern vun ehr Rente bedrifft. König Drosselbart söcht sien Bruut bi „König söcht Fru“ oder bi’t Speeddating. Aschenputtel köfft ehr Schöh in’t Innernet. Un mit dat Öller hebbt se all so jümehr Probleme. Dat hele Stück is vull vun lustige Ideen.
Opfullen is mi sünnerlich Markus Gillich, de jo nu to’t faste Ohnsorg-Ensemble tohören deit. Sien Rull as Aschenputtel mit Schohtick speelt he mit den Song „Nee’e Schöh!“ (Only you) jüst so goot as de as „DJ“ Rumpelstilzchen wo he mit „En Dwarg, de mien Naam driggt“ (Ein Stern, der deinen Namen trägt) de Karaoke-Partyhits op’n Arm nümmt.
Tanja Rübcke singt as Schneewittchen na all de Moordanslääg vun ehr Steefmudder „Ik bün noch dor“ (I will survive). Un en bannig starken Optritt hett Sandra Keck mit „Ik bün de Hex“ (Holding out for a Hero). Hoot af! Bi dat Udo-Jürgens-Medley lett se dat as Grootmudder noch „Mit hunnertsöven Johr“ krachen. – Sössunsösstig is för de Plattdüütschen noch gor nix. – Un Horst Arentholt singt mit sien „Ik weer noch nienich rank un slank“ (Ich war noch niemals in New York) tegen den Diätwahn an.
Bi de Plattdüütsche Version vun „It’s Raining Man“ heff ik doch mit Wehmoot an unsen Versöök trüchdacht, dat in uns Plattkurs to översetten. Ok wenn een hier sacht nich vun en Översetten snacken kann („Söök di en Mann“) kann de Song en plattdüütschen Text doch bannig good verdrägen un mookt eenfach Luun, so as dat hele Stück bannig veel Spooß mookt un een na poor Togaven heel vergnöögt ut’t Theoter geiht.
Heft Artikel von: Kücklich, Petra