Al to’t negente Mol wörr mit den Bandwettstriet „Plattsounds“ de beste plattdüütsche Song ut Neddersassen söcht. Dat Finale weer an’n 09.11.2019, dütmol in Stood, in’n „Alten Schlachthof“. Ölven Deelnehmers harrn sik qualifizeert, dree Solomusikers un acht Bands. Dat geev wedder heel verscheden Oorden vun Musik to hören: vun Singer-Songwriter över Pop un Reggae bet Rock, Punk un Metal. Anreist weern de Musikers ut heel Neddersassen. Ut Hannober kemen glieks en poor vun de Deelnehmers, man ok ut de negere un wiedere Kuntrei vun Stood, ut Uelzen, Vechte, Ossenbrüch un Göttingen. Nodem de Wettstriet in’e verleden Johrn meisttieds bannig keerlslastig weer, weern dütmol bi veer Bands Deerns tominnst mit dorbi. Un dree dorvun sünd op de eersten dree Plätzen lannt. De Jury ut Poetry-Slammersche Gesche Gloystein, Linda Wilken vun’e Emslännische Lanschop, Musikschoolmestersche Angela Martens  un Patrick Frerichs, de bi Plattsounds-Winner 2017 „De Winnewupps“ dat Slagtüch speelt, harr dat nich licht. Man opletzt sünd se sik doch eenig worrn. De drütte Pries güng an de Süstern Julia un Gina Giampietro ut Wittstedt mit jümehrn Song “Sülvige Boot”. Se sünd eerst 16 un 14 Johrn oolt un hebbt mit E-Gitarre un Slagtüüch en orrig satten Sound röverbröcht. Dat Leed, dat Julia eerst för en Film schreven hett, schall ok op dat Klimaprobleem henwiesen. Op den tweten Platz keem de Band „Whale in the desert“ ut Buxtehuud un Nee Wulmsdörp. mit „Jümmers sutje“. Dat is en Mix ut verscheden Musikrichten, bi den de wunnerbor soulige Stimm vun de Singersche jüst so goot rutkümmt as de Rapinlogen. De Band hett al verleden Johr bi Plattsounds in Leer den drüdden Pries kregen un se sünd wirklich noch beter worrn. Düt Johr kregen se opto ok noch den Publikumspries vun’t Online-Voting. Plattsounds 2019 wunnen hebbt de Ledermakersche „Marie Diot“ ut Hannober un ehr Gitarrist Fabian Großberg. De beiden sympathschen Musikstudenten präsenteern mit „Huh, ik bün bang“ över een, de no’t Finster in’t Huus güntsiet röverkiekt un sik Gedanken mookt, keen dor wohnt, en Song, de witzig is un togliek plietsch. Dorbi levern se en hoge musikaalsche Qualität, hebbt heel goot Platt sungen un en bannig goden Kuntakt to de Tokiekers un –hörers opbuut, so de Jury.

Modereert hett den Avend wedder Annie Heger. Se föhr mit lockere Snacks över de Ümbupausen twischen de Bands weg un bröch in lütte Interviews männich interessantet Detail vördag. Man se harr ok eernsthaftigere Themen praat. So beklaag se, dat Plattdüütsch in’n Runnfunk jümmers weniger opdükern deit un födder op, wi Plattdüütschen schullen de Senners dat doch wiesen, dat wie dat hören wüllt un dat wi vele sünd, dör Anropen, Mails, „Likes“ op Facebook un so wieder. Dat müss en Plattrevolutschoon geven vördem dat heel un deel verswinnt. Opto weer ok dat Openmoken vun’e Grenz no de DDR vör nipp un nau 30 Johren en Thema. Annie Heger vertell vun en Fründschop twischen ehr Familie un en Familie ut Meckelnborg, de noch vör düsse Tiet dör en roden Luftballon grünnt worrn is, de dat vun Ostfreesland bet dorhen schafft hett. Se reep dorto op, dat de Minschen över all Grenzen un Ünnerscheden in Gloven un Menen weg tohoopstahn schüllt. Ik dink, dor kann jeedeen al mol bi sik sülven anfangen un mit sien Neegsten fründlich ümgahn.

Blangen allgemene un persöönliche geev dat ok in de Leders politische Themen. Bi en groten Deel vun’e Deelnehmers hett Hans-Hinrich Kahrs för de plattdüütsche Version sorgt, man ok anner Plattexperten oder de Grootöllern hebbt dorbi hulpen. Platt snacken kunnen blots wenige vun de Deelnehmers. Man ok mang dat Publikum seeg dat nich veel beter ut. Bi de Froog no’t Verstahn vun Plattdüütsch hebbt sik denn al düütlich mehr mellt. Ik harr mi för düssen wunnerboren Avend noch mehr Tokiekers wünscht. Dor weer in fröhere Johren al mol mehr los, dücht mi. Man so harr een noch goot Platz, sik to rögen, un de Stimmung weer goot. Dat is bi Plattsounds jümmers besünners to beleven, woans sik Lüüd in jeedeen Öller an de plattdüütschen Songs freit. De Verbinnen vun Platt mit moderne Musik verbinnt ok de Lüüd. Un bi de een oder anner Band speelt Platt ok wiederhen en Rull, so as bi de Plattsounds-Veteranen „De Schkandolmokers“. De hebbt al bi Plattsounds 2012 den tweten Pries kregen un nu in de Jurypaus mit ehrn plattdüütschen Punkrock un Songs as „Pogo op de Diek“ oder „Plattsnackers United“ den Slachthoff to’n Koken bröcht. Dat Kunzept vun’n plattdüütschen Bandwettstriet geiht op, dor köönt de Erfinners stolt op ween. Un wi köönt uns al freien op de neegste Runn vun Plattsounds un op Plattbeats an’n 25.04.2020 in Hamborg.

Heft Artikel von: Kücklich, Petra