Annerletzt heff ik en wunnerboren Vördrag vun Fru Dr. Viola Wilcken över Missingsch heurt. Se hett dat fein verkloort. Missingsch is en Form vun’t Hoochdüütsche (de Wetenschoplers seggt „Varietät“ dorto) mit vele Merkmole vun’t Plattdüütsche dorbin. Tostann komen is dat dunntomol, as de Lüüd in Noorddüütschland, de betto blots Platt kunnen, opmol Hoochdüütsch snacken wullen. To de Tiet hebbt se dat „beste“ Hoochdüütsch in Meißen snackt. Also wullen de Lüüd geern snacken as in Meißen: „Meißnerisch“. Un dor is denn „Missingsch“ ut worrn. Man de Plattdüütschen harrn dat suer mit dat Hoochdüütsche. Den Ünnerscheed twüschen Dativ un Akkusativ kennen se so nich un hebbt dat denn verwesselt. De Mehrtall hebbt se billt as op Platt, foken mit en „s“ an’t Enn: „Frauens“. Sätze hebbt se opbuut, as se dat vun’t Plattdüütsche wennt weern: „Dor nich för!“. Un foken hebbt se ok eenfach plattdüütsche Wöör na’t Hoochdüütsche övenohmen. Dat sünd allens Kennteken vun Missingsch. Reste sünd dor vundaag noch vun över. So bruukt wi heel natürlich dat Woort „lütt“ in uns Alldag. Sogor mien Kinner köönt dor wat mit anfangen. Man een, de keen noorddüütschen Achtergrund hett, kümmt dor sachts nich foorts mit klor.

Op de anner Siet beleev ik dat vundaag foken al annersrüm. In Tieden, in de Plattdüütsch al wedder „cool“ warrt, gifft dat’n Barg Lüüd de Plattdüütsch snacken oder ok schrieven wüllt, man vun dat Hoochdüütsche nich heel un deel looskoomt. De klütert denn hoochdüütsche Bandwormsätz ut plattdüütsche Wöör tohoop. Oder se bruukt hoochdüütsche Wöör, ofschoonst dat dor wunnerbore plattdüütsche för gifft. Männicheen begrippt nich, dat een de een oder anner Saak op Platt numol beten anners utdrücken mutt. Wenn dat to dull warrt, will ik mi dor männichmol meist över argern. Dorbi is dat doch blots Plattingsch! Ik segg ok gor nich, dat mi sowat nienich malöörn deit. Man op’t letzt hett sik dat Hoochdüütsch jo tegen dat Missingsch dörsett. Dat lett doch hopen, oder?

Heft Artikel von: Kücklich, Petra