Allerbest weer de Stimmung an’n 21.04.2018 in’t vulle Hamborger LOGO bi’t Finale vun den plattdüütschen Bandcontest PLATTBEATS, organiseert vun’t Plattdüütschzentrum för Holsteen in Mölln, vun Anfang an. Dor leeg orrig Opregen in’e Luft, wat dor för Musikers un Bands in’t Öller twüschen 15 un 30 Johrn to beleven weern un wokeen an’t Enn de Priesen mit no Huus nehmen dörv. Meist nich mehr uttoholen weer de Opregen bi de Schölers ut de sösste Klass vun de „Schule am Meer“ ut Travemünn. De präsenteren glieks to’n Optakt ehrn plattdüütschen Song „Ward dat wat?“, den jümehr Schoolmeistersche Kirsten Frey sülvst schreven hett, inklusive Danzperformance un Videoclip, un sorgen so foorts för Begeisterung. Een vun’e Deerns verklor achteran in’t Interview, cool mit Sünnbrill heel un deel de tokamen Plattdüütschstar, dat al de neegste Song ploont weer.

De twete Börgermeistersche vun Hamborg, Katharina Fegebank, swöög in ehr kotte Reed vun de Begeisterung, mit de Organisator Thorsten Börnsen ehr dat Projekt vörstellt harr un de ok an düssen Avend bi de Deelnehmers un all de Lüüd, de in grote Tall in‘t LOGO kamen weern, to spören weer. Se verkloor de Idee, den Contest mit den Plattdüütschdag för Hamborg to verbinnen, un dat dat wiss ok in Tokunft Stütt för dat Projekt geven kunn. Ok Klaus Schlie, de Präsident vun’n Sleswig-Holsteenschen Landdag funn in sien Reed op Platt veel Loff för de Veranstaltung as Schangs, de plattdüütsche Sprook ünner de jungen Lüüd to bringen.

Denn güng dat ok al los mit de teihn Bidrääg, de sik för’t Finale düssen Avend qualifizeert harrn un all Musikrichten vun Hip Hop över Rock, Punk, Metal bet Singer-Songwriter repräsenteren. Mit glieks veer Bands kemen de mehrsten Deelnehmers ut Flensborg. Dor harrn se düssen Avend denn sachts de Footstiegen hoochklappt, meen Thorsten Börnsen, de tohoop mit Miriam Buthmann vun’e Tüdelband mit veel Humor un interessante Frogen un Anmarken locker dör den Avend föhr. So froog he foken, wat de Musikers sik vörstellen kunnen, noch mehr Leders op Platt optonehmen. För de eerste Band, „Opposite of Silence“ ut Flensborg, weer dat en interessantet Projekt, den Text vun Ingelsch över Hoochdüütsch in’t Plattdüütsche to bringen un sik so mit en för jüm musikalisch niege Spraak to befaten. Man en kloret „Jo“ heff ik dor nich heurt. Vun de Band „Skampi“ ut Hamborg-St. Georg keem op de plattdüütsche Interviewfroog denn trüch: „Kannst du das auf Deutsch nochmal sagen?“. Ehr Twee-Minuten-Stück „För di“ weer denn ok de eenzige Bidrag ut Hamborg. Leve Hamborger Bands: Ik glööv, dor geiht noch wat! – Anners seggt bruukt Hamborg en hauptamtliche(n) Plattdüütschbeopdragte(n), de sik üm sowat kümmern un ok op junge Lüüd togahn deit.

De mehrsten Bands harrn sik jümehr hoochdüütschen oder ingelschen Songtexte in’t Plattdüütsche översetten loten. En groten Andeel harr dorbi ok Gesa Retzlaff, de niege Baassche vun’t Plattdüütschzentrum in Leck. Meist jeedeen twete Band vertell: „Bi’t Översetten un Insingen hett uns Gesa hulpen!“. De weer denn ok heel un deel begeistert vun de gelungen Veranstalten. Dorbi harr dat, as Musiker Marten Threepwood sä, af un an ok Ringen un Strieden üm Wöör un den passlichen plattdüütschen Utdruck geven. So harr he ok vun de plattdüütsche Sprook wat mitnahmen. Sänger Tim Sünram vun de Punkband „Zeitbombe Armut“ ut Seebarg snack sogor Platt. Se sünd al mol as Vörband vun de plattdüütsche Musikgrupp Aalkreih optreden un bekeken in jümehr kritischen Song „Kole Tiet“ de politische Situation in Düütschland.

De ludesten Fans harr de Punkband About Blank ut Mölln mitbröcht. De Sänger verkloor, se wullen nich afsluuts en Hit aflevern, man toeerst mol tohoop mit dat Publikum Spooß hebben un fiern. Dat dään se denn ok, un de Fans kregen mit jümehrn Pogodanz meist mehr Opmerksamkeit as de Band sülvst. Thorsten Börnsen meen plinköögsch, nu kunnen wi beleven, wo sik dat anföhlt, jeedeen Morgen no Mölln to Arbeid to fohren. Dorgegen weer Hamborg meist’n Zentralfriedhoff. Pogo harr he ok lang nich sehn. Een müss man blots öfter op’n plattdüütsche Party gahn. Dor geev dat sowat noch. Bannig luud wörr dat denn nochmol to’n Sluss as de Metalband DieTone ehrn Song vörstell. De Jungkeerls wiesen, wo hitt dat düssen Avend togüng un harrn en goden Deel vun jümehr Kledaasch afleggt.

Dor weer de Optritt vun Singer-Songwritersch Isa Zwart ut Emmen in’e Nedderlannen op Drenter Platt in’e Jurypaus en willkomen Kuntrastprogramm. Ok wörr düütlich, dat Bewohren un Föddern vun’e plattdüütsche Sprook is nich blots in Düütschland en Opgaav. Man för’t Snacken müssen se un Thorsten Börnsen denn doch Ingelsch to Hölp nehmen.

De Jury ut Thomas Christiansen vun’t Veranstaltungszentrum „Volksbad“ in Flensburg, Norma Schulz, Singer-Songwritersche ut Föhr, nu in Hamborg, Bert Kamping, Singer-Songwriter ut Drente, Nedderlannen, un Ulrike Stern vun’t Kompetenzzentrum Nedderdüütsch an‘e Uni Greifswald weer sik no en Punktesystem mit verscheden Aspekten op de dree Priesdrägers eenig worrn. De drütte Pries, en Instrumentengootschien över 250 €, güng an Miss Allie, Singer-Songwritersche ut Lümborg un ehrn Song „Swiensteak Medium“. Dorin tell se op, wat se denn allens för ehrn Fründ ween müch, dat he sik mehr för ehr interesseer, to’n Bispill sien Reekner, sien Fernseher, sien Sofa, sien Motorrad, en Fatt Astra oder even en Swiensteak Medium, dat he so geern mag. Mit düssen Song weer se al bi den Süsterwettstriet Plattsounds 2017 in Celle op den tweten Platz komen. Se müch wieder Musik mit plattdüütsche Texten moken. Den tweten Pries bi Plattbeats, 500 € as Instrumentengootschien, kreeg ok en Singer-Songwriter: Malte Schöning ut Uetersen mit sien Song „De olle Bitch“. Den harr he för sien Exfründin schreven.

De eerste Pries, en Instrumentengootschien över 750 €, wunn de HipHop-Band Standbild ut Flensborg. De fief Jungkeerls bekloogt in jümehrn Song „404“ de grote Rull, de de elektroonschen sozialen Medien vundoog in’t Leven vun de Lüüd speelt. In een Reeg vun den Text heet dat „Wi hebbt uns Facebook, Twitter, Instagram in’t Leven installeert“. Se verpackt den kritischen nodenkern Text in ingängige Musik mit Hip Hop- un Elektro-Rap-Elementen, de een mitrieten deit un to de een sik foorts rögen mutt. Jümehrn Spooß an’e Musik is op’e Bühn düütlich to marken un överdriggt sik op’t Publikum. För mi hebbt se en klore Schangs as Nofolger vun de Elektro-HipHop-Band De fofftig Penns, de jo nu opholen wüllt. Man mit jümehr egen Oort un wat eernsthaftigere Texte. Sänger Pascal Bahr kenn Platt al vun sien Grootöllern. De Band gifft dat al beten wat länger as Kellerband. Man verleden Johr güng dat richtig los un se hebbt al en Reeg Optritte hatt.

Alltohoop weer de Veranstalten en runne Sook un hett bannig Spooß mookt. Dat weer bi all de Lüüd düütlich to spören. As Oort vun’e Veranstalten weer dat LOGO perfekt utsöcht. Dat harr jüst de richtige Grött för en kommodige lockere Stimmung. Mit Plattbeats hett Thorsten Börnsen nu sien twetet „Baby“ op’n Weg bröcht, dat sik achter de öllere Süster Plattsounds wiss nich versteken mutt. Dorto graleer ik un wünsch jüst soveel Spood as mit Plattsounds, dat nu in’t achte Johr geiht.

To’n Sluss bedank sik Thorsten Börnsen bi dat hele Plattbeats-Team un all, de wat dorto bidrogen harrn, un verafscheedt de Lüüd mit de Wöör: „Wi seht uns bi Plattbeats 2019!“. Wenn’t no mi geiht, vun Harten geern, sülvst wenn ik dorför no Flensborg karjolen müss!

Kiek di ok de Fotos an.

Heft Artikel von: Kücklich, Petra