Wo geern weer ik düt Johr wedder bi’t Finale vun den Musikwettstriet PLATTBEATS in’t LOGO in Hamborg dorbi west! Man düt Johr is jo allens anners un so is dor nix ut worrn un dat geev en Finale in’t Nett. Kloor weer ik dor ok bi, op Besöök op de Nettsteed.
En Tiet lang hett sik PLATTBEATS mol op de egen Nettsteed »De gröttste plattdüütsche Musikwettstriet in’n Noorden« nöömt. Dorbi kümmt dat jo jümmers op an, wat een meten deit. Wat de Kuntrei anlangt, woneem de Deelnehmers herkoomt, stimmt dat nu wiss. Losgahn is dat 2018 mit Hamborg un Sleswig-Holsteen. Dor hebbt wi mit dat grootordig Finale in’t LOGO in Hamborg en wunnerbor Premiere fiert un jeedeen weer ut de Tüüt un wüss: Dat mutt wiedergahn! (Bericht in Heft 2/2018 un op uns Nettsteed) 2019 weer denn ok Meckelnborg-Vörpommern mit dorbi un dat Finale wöör in Kiel utdrogen. Un nu is PLATTBEATS en Musikwettstriet för junge Lüüd ut den helen Noorden. Dor is blangen Bremen denn nu ok Neddersassen dorbi, woneem se siet 2011 elkeen Johr den Wettstriet PLATTSOUNDS no dat sülvige Kunzept mit veel Spood veranstalten doot. Man dat blifft jo sotoseggen in’e Familie: Thorsten Börnsen, de »Vadder« vun PLATTBEATS, hett dunntomol ok PLATTSOUNDS mit op’n Weg bröcht. Dor bruukt wi uns meist nich wunnern, dat dütmol glieks dree Deelnehmers bi PLATTBEATS dorbi weern, de mit densülvigen Song al bi den Süsterwettstriet PLATTSOUNDS op’e Bühn stahn hebbt. De Singer-Songwriter Pommes Fritz, de egens ut Wismar kümmt, man nu in Greunendiek wohnt, weer mit sien Song »Heimat tau di trög« verleden Johr bi’t PLATTSOUNDS-Finale in Stood dorbi. Whale in the Desert, nu en Hamborger Band, hebbt mit jümehrn Song »Jümmers Sutje« bi PLATTSOUNDS 2019 al den tweten Pries vun de Jury un den Pries vun’t Afstimmen in’t Nett hoolt. Un de Rockband Apollo Circus ut Emmen harr 2018 mit den Song »Jo, jo, jo« sogor dat PLATTSOUNDS-Finale in Leer wunnen. Mag ween, dat weer nich so licht to, düt Johr noog Deelnehmers tohoop to kriegen. An’n 25. März, bet to den de Bewarven ingahn schullen, harrn wi jo al den Corona-Lockdown un dat för den 25. April ploonte Finale weer al afseggt.
Dorför geev dat nu en Afstimmen in’t Nett un jeedeen kunn op de Nettsteed vun PLATTBEATS sien oder ehr Stimm för een vun de negen Deelnehmers afgeven. Schull nu de gewinnen, den sien Frünnen op’t gaust mit de Muus togang sünd? Nee, dat weer al afsekert. Du kunnst dor nich eenfach so foken as du wusst ropklicken. Bi’t Afstimmen müsst du dien Mailadress angeven un hest denn en Code tostüert kregen, den du ingeven müsst. Opto schull dor to een Hälft ok noch en Jury över de Priesen mitbestimmen.
Spannend weer, dat een de hele Tiet sehn kunn, woveel Lüüd al afstimmt hebbt un woveel Stimmen dorvun jeedeen Deelnehmer kregen hett. Weniger fein villicht för de, de nich so’n goden Start harrn. Mag ween, de een oder anner hett ehr oder sien Stimm lever en Deelnehmer geven, de beter Utsichten op en Pries harr. Ik heff dat nich mookt. Dat güng jo nich üm en strategisch Wohl, man üm dat Befoten mit de plattdüütsche Sprook un dat Ümsetten in Text un Musik. Dor hett jeedeen sien oder ehr egen Möög. Un mang de heel verscheden Bidrääg in düssen Wettstriet kunn wiss jeedeen sien Favoriten finnen. Dor geev dat Synthiepop as ut de Tachentiger, Alternative Rock, Death Metal, Singer-Songwriter, Düütschpunk un Indie-Pop to heuren.
No de Tallen op de Nettsteed leep dat toletzt op en Wettstriet Kopp an Kopp twüschen de Rockband Mountain Bricks ut Hannober un de Death Metal Band Armagenda ut Wismar rut. An’n Sünnobend, den 26.9. un letzten Dag vun’t Afstimmen, harr eerst Mountain Bricks de Nees vörn. Man denn harrn sik as’t lett de Fans vun Armagenda noch orrig in’t Tüüch leggt. So harrn de, as dat Afstimmen pünktlich üm Middernacht vörbi weer, de mehrsten Stimmen. An drütte Steed stünnen Whale in the Desert, dorno kemen de Band Jack Pott ut Bad Schwartau, de ehren Düütschpunk mit Synthiesound ut de Tachentiger vermengeleert, un de Singer-/Songwriter Dennis Samel-Martens ut Fintel in Neddersassen. As dat utseeg, harrn dor över dreedusend Lüüd afstimmt. Dat is mehr as foken bi so’n »repräsentative Ümfroog« vun en Institut, dat Menen vun de Lüüd utspikeleert. Dor weer ik denn neeschierig, wat de Jury denn dorto see. To de heuren de hoochdüütsch/plattdüütsch/freessche Singersche Norma, Ulrike Stern vun’e Uni Griepswoold, Lornz Lorenzen vun’n NDR un Bert Kamping ut Emmen in’e Nedderlannen, de dor elkeen Johr dat Drèents Liedtiesfestival för Musik op Drenther Platt organiseert.
Man as ik denn an’n Sünndag wedder op de Nettsteed nokeek, stünnen dor heel anner Tallen ut dat Afstimmen. Dor harrn as’t lett doch en Reeg Lüüd dat togang kregen, dubbelt aftostimmen, un en Barg Stimmen weern, as de Veranstalters schreven, vun so nöömte Bots (vun ingl. robot) afgeven worrn. Dat sünd lütte Computerprogramme, de egalweg jümmer wedder dat sülvige mookt, as to’n Bispill bi en Afstimmen en Stimm för een bestimmten Deelnehmer afgeven. De köönt männichmol bannig plietsch utklamüstert ween. Dor hett dat Afsekern över den per Mail tostüerten Code sachts doch noch nich langt oder nich slumpt. Man de Veranstalters hebbt, as op de Nettsteed to lesen weer, de dubbelten un de Automotenstimmen denn doch to Künn kregen un wedder aftrocken. Dorno hebbt dor denn »blots« 899 echte Minschen mitmookt. Is jo ok noch en orrige Tall.
Op’t flietigst hebbt de doren Bots för de Band Armagenda afstimmt. De Keerls ut Wismar hebbt dör dat Korrigeern över tachentig Perzent vun jümehr Stimmen verloren. Man dat hett ümmerhen noch för den drüdden Platz langt. Meist liekveel Stimmen wöörn bi de Band Mountain Bricks aftrocken. Dorwegen sünd se glieks dree Plätz afrutscht. Un ok Whale in the Desert weern no de Korrektur nich mehr ünner de eersten dree to finnen. Dennis Samel-Martens harr blots twee Hannen vull Stimmen verloren un funn sik nu vör Armagenda op den tweten Platz wedder. An eerste Steed stünn no de Korrektur nu de Band Jack Pott. De eenzigen, de poor Stimmen dortowunnen hebbt, weer de 1918 Hafenbande. Man för een vun de eersten dree Plätzen hett dat nich langt. Dorför mookt de nu wedder bi den Bandwettstriet PLATTSOUNDS mit, woför nu in’n November dat Afstimmen löppt. De Winner vun PLATTSOUNDS 2018 Apollo Circus hebbt blots wenig Stimmen afkregen. Sachts gellt ok bi de Plattdüütschen, dat een mit en twee Johr olen Song keen Blomenputt mehr gewinnen kann.
De Jury hett dat, wat bi dat Afstimmen rutsuert is, denn ok nich mehr ännert. Wat de dorto see, weer narms to heuren oder lesen. Keen wunnen harr, verkünn Thorsten Börnsen tohoop mit de Poetry-Slammersche Gesche Gloystein denn an’n Sünndagobend in en lütt Video, opnohmen an’e Hamborger Lannungsbrüchen bi scheunstet T-Shirt-Wedder. Dor harrn se bannig Glück. In mien Eck vun Hamborg weer dat den helen Sünndag gries, koolt un natt.
De Priesen weern över heel Noorddüütschland verdeelt. Över den eersten Pries vun 700 € freien kunn sik de Band Jack Pott ut Sleswig-Holsteen. De twete Pries (300 €) güng an Dennis Samel-Martens ut Neddersassen und den drüdden (200 €) kreeg Armagenda ut Meckelnborg-Vörpommern. Deerns weern mang de Priesdrägers wedder nich to finnen. Dor hebbt ok blots wenige mitmookt. In’n Oproop to’n Mitmoken bi de neegste Runn vun PLATTBEATS hebbt se nu den Gender-Steern bruukt, dat sik jeedeen inlodt föhlt. Denn de veerte Runn is al losgahn mit en Online-Optakt an’n 24. Oktober. Dor verkloor Thorsten Börnsen nochmol dat Wichtigste rund üm den Wettstriet, de Tüdelband speel poor vun jümehr bekanntesten Songs un Nikos Saul präsenteer en Gedicht mit Zitaten vun Klaus Groth un en Riemel extra to’n PLATTBEATS-Optakt. De Veranstalten vun üm un bi 25 Minuten kann een sik op de Nettsteed vun PLATTBEATS oder de Nettsteed vun’t Zentrum för Nedderdüütsch in Holsteen noch ankieken. Bewarven köönt sik de jungen Musiker*schen un Bands bet to’n 24. März 2021 ünner www.plattbeats.de. Kloor gifft dat denn ok wedder Hölp bi dat Plattdüütsche. För den 24. April 2021 is denn en groot Live-Finale ploont. Loot uns all hopen, dat dat denn wedder geiht!
Heft Artikel von: Kücklich, Petra