Dat sünd twee hoochdüütsche Kinnerböker, de beiden Bänn »Die schwarze Viereinhalb sticht in See« und »Die schwarze Viereinhalb auf Schatzsuche« ut de Reeg »Ostseepiraten« vun Björn Ortmann, jüst rutkomen bi den Verlag Max Schmidt-Römhild GmbH & Co. KG. Dor wörr ik egens an düsse Steed nich över schrieven, wenn dor nich de coole Opa weer, de in de Geschichten en Rull speelt, denn de Opa snackt Platt! Jüst so as Dörte Hansen in ehr „Mittagsstunde“ de Dörpslüüd Platt snacken lett, bringt Björn Ortmann dat Plattdüütsche heel natüürlich dör den Opa, de mit de Kinner en Flott buut un jüm Stütt bi jümehr Aventüer gifft, in de hoochdüütsche Welt.

De „Ostseepiraten“ sünd veer Kinner in’e drüdde bet veerte Klass, un för düt Öller egent sik ok de Böker allerbest. Blangen den Käpt’n Kurt Haiberger, de sik »Kuddl Shark« nöömt un sien twee Frünnen un een Fründin heurt to de Mannschop ok noch sien lütten Broder to, dorwegen de »Schwarze Viereinhalb«. Björn Ortmann hett de Kinner un ok de groten Lüüd in sien Book mit all ehr besünner Egenschopen, Macken un Grappen lebennig un mit veel Humor un Leevde to’t Detail beschreven. Al dat mookt dat Lesen to’n Pläseer. Dor gifft dat to’n Bispill den Jung Jannis, de egolweg an’t Eten is un ok bi’t Snacken den Mund vull hett. So is dat dor denn ok opschreven, un keen dat versteiht, de versteiht ok Platt. Dorto gifft dat achtern in’t Book noch en Wöörlist, in de en Reeg plattdüütsche un ok maritime Wöör ut dat Book verkloort warrt.

Gefullen hebbt mi ok de Themen, de dor opdükert un goot ut de Sicht vun’e Kinner bekeken warrt, un dat Oprümen mit ole Rullenbiller. So ist dat hier jüst de Deern, de op’t best mit Matschklüten ut de „Boordkanoon“ scheten kann. Överhaupt finnt jeedeen vun’e Kinner no sien Künn un Vörleev sien Rull in’e Piratenmannschop. In’t twete Book kümmt en niege Schölersch in’e Klass, de in’n Rullstohl sitt. Björn Ortmann hett heel goot beschreven, woans de Kinner eerst nich recht weet, woans se mit ehr ümgahn schüllt, man denn doch gau all tohoop in’t Snacken koomt un se op’t letzt ok mit op’t Flott fohren kann. Fründschop is dat zentrale Thema, dat sik dör de Böker treckt.

As Björn Ortmann de toeerst in’n Egenverlag rutbröchten Böker nu an den Verlag Max Schmidt-Römhild geven hett, hett he nochmol dat Platt un de Schrievwies pröven loten, so gifft dat dor ok nix an uttosetten. Afrunnt warrt de Geschichten noch dör de Biller, de Andreas Klüver tekent hett, un natürlich dat Leed, mit dat allens anfung, un dat mit Noten ok achtern in’e Böker to finnen is. Keen dat hören müch, kann dat op de Nettsteed vun Björn Ortmann https://bjoern-ortmann.jimdofree.com/ doon, oder he oder se köfft sik glieks een vun de Hörbökers, de een to beide Bänn dor direktemang bi den Schriever bestellen kann. Op de Nettsteed gifft dat ok lütte Leesproven ut de Böker un Infos, wat Björn Ortmann sünst noch mookt – to’n Bispill plattdüütschen Rock’n Roll.

Wiss egent sik de Böker för Kinner, de in’e School Platt lehrt. Man Vorutsetten is dat nich. De Böker sünd eenfach en goden Weg, Kinner heel blangenbi to wiesen, dat wi hier in’n Noorden noch en anner wunnerbor Sprook hebbt. Keen Enkelkinner in dat passliche Öller hett, kann jüm jo mol en Book oder Höörbook vun de Oostseepiraten schenken. Villicht froogt de denn: „Opa, kannst du auch so cool Platt schnacken?“

Björn Ortmann (Texte), Andreas Klüver (Bilder): „Ostseepiraten – Die Schwarze Viereinhalb sticht in See“ (ISBN: 978-3-7950-7125-7) und „Ostseepiraten – Die Schwarze Viereinhalb auf Schatzsuche“ (ISBN: 978-3-7950-7124-0), Verlag Max Schmidt-Römhild GmbH & Co. KG, Lübeck 2021

 

 

Heft Artikel von: Kücklich, Petra