De nie Ohnsorg-Speeltiet steiht vör de Döör un för den Intendanten Michael Lang is dat mit de Saison 2019/2020 al de drütte. Mit de letzt Speeltiet is he heel tofreden, denn de Utlasten weer goot – so an 71,2% in’t grote Huus un de Studio-Bühn hett dat op 96,9% Besökers bröcht. Michael Lang gifft aver ok to, dat nich jedeen langjohrig Ohnsorg-Besöker dormit torecht kümmt, dat dat ok Stücken gifft, de nich „pur Plattdüütsch“ sünd. Mit Vörstellungen in Platt- un Hoochdüütsch will man de Hemmswell för de jünger Generatschoon afbuun. Wat ok to verstahn is.

De nie Saison fangt an’n 25. August an mit den Ohnsorg-Klassiker „Een Mann mit Charakter“ vun Wilfried Wroost. Heidi Mahler is in de Paraderull as „Dora Hinzpeter“ wedder mal an’t Huus. Michael Koch föhrt Regie. Dat is en „verdüvelt“ goden Speeltiet-Start.

Folgen deit an’n 06.10.19 de Ur-Opföhren „Extrawurst“. Meike Meiners hett de Komödie in de Plattdüütsche Spraak sett un föhrt ok Regie.

As letzt Premiere in’t Johr 2019 gifft dat an’n 17.11.19 de Komödie „Alarm in’t Grand-Hotel – Suite Surrender“ vun Micheal McKeever, in de plattdüütsche Spraak sett vun Cornelia Ehlers. De Oberspeelleiter Murat Yeginer föhrt Regie. Dat warrt, as man seggt: “eine köstliche Screwball-Komödie“ un Musik is ok dorbi.

Denn is dat ok al wedder sowiet för dat Wiehnachtsmärken, as jümmers op Hoochdüütsch. Ayla Yeginer, de Dochter vun Murat Yeginer, föhrt Regie. Dat gifft „Der Zauberer von Oz“ na dat Kinnerbook vun Lyman Frank Baum. Dat löppt vun’n 23.11. bet hen to’n 29.12.19. Dat warrt en zauberhaft-kunterbunt Märken mit Musik. As jümmers bi Ohnsorg en heel groot Vergnögen för Lütt un Groot.

In’t niege Johr 2020 is an’n 12. Januar de plattdüütsche Eerstopföhren vun de Komödie „Willkamen – Willkommen“. Manfred Hinrichs hett dat översett un Harald Weiler föhrt Regie. Dat geiht üm dat Tosamenleven in en WG mit veel – ok kulturell – ünnerscheedlich Minschen. Folgen deit an’n 01.03.2020 de Komödie „Champagner to’n Fröhstück“ vun Michael Wempner. Dit Maal geiht dat üm dat besünner Tosamenleven vun wat öllerhaftig Minschen in en WG.

In de letzt Saison geev dat mit groot Erfolg „De Mann in’n Stroom“ vun Siegfried Lenz. Nu gifft dat an’n 12.04.2020 „Dat Füerschipp“ vun em, in’t Plattdüütsche bröcht vun Frank Grupe un ünner de Regie vun Murat Yeginer. Dat is en rein „Männer“-Stück un dorbi sünd ok Frank Grupe, Erkki Hopf, Oskar Ketelhut un Markus Gillich.

Utklingen deit de Saison mit de Komödie „Sommerfest“ vun Frank Goosen, översett vun Frank Grupe. En Heimatgeschicht mit schreeg Typen un de groote Fraag: Bliev ik in mien ool Tohuus or geiht dat wedder rut in de Welt?

Dat is de nie Saison mit Stücken, de wiss un wohrhaftig nieschierig maken doot. Ok de wunnerbor Studio-Bühn dörv nich vergeten warrn. Se is wedder vull mit Överraschungen – ok för Lütt un Groot. „Emil un de Detektive“ för Tokiekers af 6 Johrn löppt wieder. Ok de Komödie „Harold un Maude“ is wedder opnahmen mit Edda Loges as Maude, de de Rull vun de verstorven Uta Stammer övernohmen hett.

Denn kümmt in’n Januar 2020 „Bambi – Eine Lebensgeschichte aus dem Walde“ vun Felix Salten dorto – Plattdüütsch vun Cornelia Ehlers. „De lütte Herr Jemine“ is ok wiederto in’t Programm, un dat för Tokiekers af 5 Johrn. An’n 21.03.2020 is de Premiere vun „Kleiner Mann – was nun?“ na den Roman vun Hans Fallada. Inszeneern deit dat Ayla Yeginer un dwars in Hoch- un Plattdüütsch. Also ok hier en vull un kiekenswert Programm.

Man de „Ohnsorg’s Frühschoppen“ mit Yared Dibaba dörv ok nich fehlen. Dat gifft also veel, veel Interessantes to höörn un to kieken. Al maal den Kalenner vörhalen un indrägen!

Heft Artikel von: Heise-Batt, Christa