uns Vörsitter Rolf-Dieter Klooß is vun uns gahn. De Naricht vun sien Doot hett de Redaktschoon un den Vörstand vun’n Quickborn in’n September böös överrascht. Wi hebbt denn gau en niegen Vörstand för uns Johrsversammeln an’n 30. Oktober utkeken. Sylvia Pein-Dethloff is uns niege Vörsittersch worrn. Wi wünscht
ehr veel Glück för ehr Arbeit. Stütt kriegt se vun uns niegen tweten Vörsitter Johann Martin »Hannes« Frahm, vun Thomas Stelljes (Schatzmeister) un Petra Kücklich (Schriftführerin). Uns niege Bisitter sünd Bolko Bullerdiek, Cord Denker, Johanna Kastendieck und Christiane Batra.

Uns niege Vörstand. Foto: Peter von Essen

Vör 400 Johrn is twüschen de beiden Strööm Eider un Treene in’t hütige Sleswig-Holsteen en lütte Stadt gründt worrn: Freechstadt (Friedrichstadt). Uns Titelbild wiest en aktuellet Foto vun den Marktbrunnen mit en Spruch vun Klaus Groth: »He Suput, kum he hier rup / un drink he sik voll / Datt hier is en Quikborn / makt satt un nich dull«. Freechstadt is en smucke Stadt. Fohrt dor mal hen, wenn ji noch nich dor ween sünd.
In düt Heft gifft’t wedder allerhand to finnen: Literatur, Opsätz, Berichten un en ganzen Barg Rezensionen. Dor is wiss ok wat dorbi, wat jo gefallt.
Wi wünscht jo alltohoop frohe Wiehnachten un en godet Johr 2022!

Bolko Bullerdiek, Heiko Thomsen

PS: Wenn ji jo wunnert, worüm de Quickborn-Jahresgaav dütmal nich mit düt Heft verschickt warrt … dat is gau vertellt: Dat Book is noch nicht fardig un warrt eerst in’t Vörjohr utliefert.

 

Heft Artikel von: Bullerdiek, BolkoThomsen, Heiko