för dat eerste Heft in’t Johr 2025 hebbt wi nich vele Texten
tostüert kregen un kunnen ok nich all de Rubriken füllen.
Dat hebbt wi besünners bi de Rezenschonen markt. Man
wenn wi ehrlich sünd, is uns dat ditmal ganz topass kamen.
Denn in uns Depot luert noch feine Texten op den groten
Optritt. Un in’n Januar sünd de Chancen för jüm stegen,
an’t Licht vun de Apentlichkeit to kamen. Wat oftins nich
mööglich is, kunnen wi tatsächlich maken: Wi kunnen mal
gaaaaanz lange Texten in’t Heft rinnehmen. Dor hebbt
korte Texten sünst mehr Glück. Un denn drängelt sik ok
jümmer de aktuellen Texte vör de tietlosen. Kloor, de mööt
rut, anners sünd se bald överhaalt. Jeed Mal versöökt wi
Heftmakers, dorbi en gode Mengelaasch hentokriegen.
In dat vörliggen Heft finnt sik Literatur to’n Smuustern
un Högen, man meistendeels welke to’n Nadinken. Un
denn warrt een bi de Opsätz wat heel Intressantet över
dat Leed »Grüß mir den Herbert« gewohr un evenso finnt
man dor en Gedenkblatt to’n 75. Doodsdag vun den Literatur-
wetenschopper un John-Brinckman-Forscher Wilhelm Rust.
Sogor en Opsatz vun en Schölerin, de sik mit den Gebruuk
vun Platt bi Schölers in ehren Landkreis beschäftigt
hett, is dorbi. Un dat is noch nich allens.
Uns egen Lüüd un ok annere sünd wedder bi feine Veranstalten
op Besöök ween un hebbt uns Berichten levert,
so as över den besünnern Abend für Klaus Groth und Arno
Schmidt in Tellingstedt oder en Interwiev mit de niege
Baas’sche vun’t Zentrum för Nedderdüütsch in Holsteen
(ZfN) in Mölln. Denn hebbt wi noch wat över den plattdüütschen
Musikwettstriet PLATTBEATS in Bremen un
över de Platt Gala in Hamborg un un un … Aver ok bi de
Narichten gifft wat to’n Opspören. Also, veel Spaaß bi’t Lesen
un allens Gode för 2025!

Heft Artikel von: Dohrmann, SonjaDreiskämper, Irmi