nu is dat dor, dat letzte Quickborn-Heft för 2025. Wedder
mit en Barg intressante Bidrääg vun Schrieverslüüd ut verscheden
plattdüütsch Rebeden mit ünnerscheedlich Snackun
Schrievwiesen. Wi seggt groten Dank för de Bidrääg, de
ji uns tostüert hebbt!
Rudl Kinau is nu al 50 Johr doot un en half Johrhunnert
is dat ok her, dat de »Baasdörper Krönk« rutkeem. Jungdi,
wat löppt de Tiet! Vun Kinau hebbt wi en Geschicht utwählt,
de ok vundaag noch vun Belang is, un Robert Langhanke
is in sien Opsatz de Fraag nagahn, wat Kinau sien
Platz in de Literaturgeschicht is. De annern Bidrääg för dit
Heft köönt ji sülvst op de linke Siet ankieken.
Man woans kummt dat egentlich to so en Heft, dat veermal
in’t Jahr nee rutkümmt? De Redakschoon vun uns
Quickborn hett in’n Momang 14 Maten. Ümschichtig gifft
dat en ›Heftmaker‹ un en ›Hölper‹. De Heftmaker sammelt
Bidrääg vun de Quickborn-Maten un ganz besünners vun
Externschrievers. Denn warrt de Bidrääg för de enkelten
Rubriken utsöcht. In’t Oog behollen mutt een dorbi de
Tall 96. Dat sünd de Sieden, de dat Heft hebben dröff. De
Bidrääg, de nich in dit Heft druckt warrn köönt, kriggt de
neegste Heftmaker, un dormit sünd se jümmerfoort noch
in’t Rennen! De Naam vun den neegsten Heftmaker finnt ji
ünnen op de achterste Ümslagsiet.
So, leve Lesers, un nu mal nix as ran an’n Bliesticken un Papeer
(oder digital) un schrievt joon Bidrääg för dat neegste
Quickborn-Heft. Wi bruukt joon Texten bet to’n 15. Januor.
Bet dorhen wünscht wi jo all en besinnliche Wiehnachtstiet
un en goden Rutsch!

Uwe Mundry un Heiko Thomsen

Heft Artikel von: Mundry, UweThomsen, Heiko