Klookschieters un Meckerbüdels gifft dat jüst in düsse Tiet
en Barg, dücht mi. Achteran is een jo jümmers klöker. Dor
schoodt dat nix, wenn een mol nodinken deit, wat een sülvst
dat würklich beter mookt harr oder wat de anner ut sien
Sicht nich villicht ok Recht hebben kunn oder dat‘t Lüüd
gifft, de vun en Sook mehr verstaht as ik. Liekers schall een
geern sien Menen seggen oder schrieven. Dor kann denn en
intressanten Uttuusch vun warrn. Jüst dat wünscht wi uns
vun jo ok. Schrievt uns geern, wat ji meent. Överhaupt freit
wi uns, wat vun jo to lesen, to’n Bispill, woans ji to’n Plattdüütsch
Schrieven komen sünd (mehr ünner »Fundsoken«).
Un wi hebbt noch en Idee, woans ji bi uns mitmoken köönt:
Opstunns gifft dat vunwegen Corona jo noch nich soveel,
wat een in sien frie‘e Tiet opstellen kann. Man bi’t Spazerengahn
is een fein an’e frische Luft un warrt villicht dat
een oder anner wies, wo een sünst jümmers an vörbilopen
is. Oder een geiht mol niege Weeg, woneem sik wat Nieget
finnen lett. Un wenn jo dat alleen to langwielig is, denn
nehmt doch mol joon Kamera mit. Villicht finnt ji denn ok
jichtenswo en plattdüütschen Snack, Noom, Henwies oder
annern Text in joon Kuntrei. Denn mookt dor mol fix en
Foto vun (geiht jo ok mit’t Handy) un stüert uns dat to an
pk-quickborn@platt177.de. Dorto bruukt wi dat Versekern,
dat ji dat sülvst opnohmen hebbt un op’t Best ok woneem,
un dat wi dat afdrucken dörvt. Dat Titelfoto heff ik 2014 bi
en Bummel dör Esens opnohmen. Dor heff ik den Snack
in jichtenseen Finster sehn. Wi freit uns op joon Fotos, de
wiest, woans een överall Platt in uns Alldag finnen kann.
Ünner »Op Besöök« gifft dat jo in düsse Tiet nich veel to
schrieven. Wenn ji wat hebbt, man to! Liekers hebbt wi in
düt Heft wedder en bunten Struuß an Bidrääg tohoopstellt
un wünscht jo veel Pläseer bi’t Lesen.

Blievt gesund un vull Toversicht

Hannes Frahm un Petra Kücklich

Heft Artikel von: Frahm, HannesKücklich, Petra