dat niege Corona-Virus hett ok vör de plattdüütsche Welt un vör uns Heft nich Halt mookt. Vele Veranstalten sünd afseggt worrn. Dorwegen hebbt wi dütmol nich so veel bi „Op Besöök“ un ok de Norichten sünd beten wat kötter. Annere Veranstalten sünd in’t Nett ümtrocken, so as de Nedderdüütsche Autorendag ut Mölln. Överhaupt geev dat en Reeg plattdüütsche Anbotten in’t Nett: Dr. Henning Kothe verkloort in sien Podacst Corona op Platt, Ohnsorg-Schauspelers un anner Lüüd leest plattdüütsche Texte op YouTube, in’t Fackportal vun’t IQSH gifft dat plattdüütsche Geschichten to’n Luustern un Opgaven för Schölers, dat Plattdüütschzentrum in Leck hett dat Kinnerbook „Mammut Hansen leevt nich in’n Zoo“ op sien Nettsteed to’n Klingen bröcht mit Radels dorto, dat Plattdüütschzentrum in Mölln buut en egen Mediathek op, bi’n Karkenkreis Ammerland gifft dat jeedeen Dag Wöör, de Moot mookt, ok op Platt, un männichwat mehr. Goot för de, de mit ehrn Rekner in’t Nett ünnerwegens ween köönt. De dat nich köönt blifft blots dat Radio. Dor kunn een männichmol den Indruck kriegen, dat vunwegen all de Corona-Infos noch weniger Tiet för Plattdüütsch över weer as sünst al. Fehlt jo dor wat? Denn besweert jo man foorts bi joon Senner. Nich dat de dinkt, wi markt dat nich. Man dör Corona hett dat een plattdüütschet Woort ümmerhen ok in’t hoochdüütsche Radio schafft: de „Snutenpulli“.

Man klor gifft dat in uns Heft nich blots Corona. Wi hebbt ok wedder en bunten Rükelbusch an Literatur, interessante Opsätz, en Bericht vun uns Johrsversammeln un wat ji sünst vun jo’n Quickborn-Heft wennt sünd. Wi wünscht jo veel Pläseer bi’t Lesen un grööt jo mit gode Wünschen, de mit Corona sünnerlich wichtig un begäng worrn sünd:

Passt goot op jo op un blievt gesund!

 

Sonja Dohrmann un Petra Kücklich

Heft Artikel von: Dohrmann, SonjaKücklich, Petra