jüst hebbt wi Corona so bilütten överstahn, man denn
kummt de neegste slimme Saak: De Krieg in de Ukraine bestimmt
nu to‘n groten Deel uns Denken. De Minschen köönt
kuum glöven, dat dat in‘n 21. Johrhunnert Krieg in Europa
gifft. In uns verdreeglich Europa! Dor klingt een doch jümmer
noch de wunnerbore Europahymn in de Ohren – dat
Hauptthema vun »Ode an de Freud« ut den letzten Satz vun
de negente Sinfonie vun Ludwig van Beethoven, blots mit
Instrumenten un extra ahn Friedrich Schillers Text, dormit
keen europääsch Spraak övervördeelt warrt. Man wi könnt
liekers meist all den Text op Hoochdüütsch mitsingen:
»Freude, schöner Götterfunken, Tochter aus Elysium,
wir betreten feuertrunken, Himmlische, dein Heiligtum!
Deine Zauber binden wieder was die Mode streng geteilt;
alle Menschen werden Brüder, wo dein sanfter Flügel weilt.«
Dorbi besinnt sik de een oder anner villicht, dat de Ukraine
un Russland fast to glieken Tiet – so merrn vun de 90er Johren
in‘t letzte Johrhunnert – in den Europaraat bitreden sünd.
Man denn kaamt een annere Gedanken un gresige Biller in‘n
Kopp – 2014: Russlands Krim-Annektschoon un 2022: Russland
grippt sien Naver an. Jeden Dag kriegt wi in‘t Blatt, in‘t
Feernsehn un in‘t Radio wat över dat Grugen in de Ukraine
mit. Woans kunn dat so wiet kamen? Wat schall dat? Wokeen
kann düssen Krieg stoppen? Un denn gifft dat to glieken Tiet
ja ok noch anner Kriegen. Dormit hebbt wi in Gedanken all
wat mit to doon un dat is ok in‘t ne‘e Heft to marken. En poor
Schrieverslüüd hebbt sik op literaarsch Oort un Wies mit dat
Thema beschäftigt. Dat is wichtig un mutt so ween, aver in
düt Heft gifft dat denn ok noch wat to‘n Smuustern. Ole Texten
över dat ewig junge Thema Leevde un en poor Woortkonstellatschonen,
de sik »Konkrete Poesie« nöömt. Denn
köönt jüm so as jümmer intressante Opsätz finnen. Na kloor
gifft dat ok en Bericht un Fotos vun den 3. Hamborger Plattdüütschdag
un en Bericht över de Johrshauptversammeln
vun den Quickborn un wat för de Lütten un un un …
Also, kiekt rin un laat sik överraschen.

Veel Spaaß bi’t Lesen wünscht

Hannes Frahm

Heft Artikel von: Frahm, Hannes