1922 weer dat Johr, wo för de engelsche Literatur mit den Irlänner
James Joyce de Moderne anfung. Hunnert Johr later hett uns
plattdüütsch Schrieversmann Timo Hensekoh Joyce sien Ulysses
ut dat Bökerboord haalt. In Hensekoh sien Geschicht »Schoolmeester
Bloom kann nich slapen« gifft dat keen Punkten un keen
Kommas, jüst so as bi Molly Bloom ehren beröhmten Monolog
an’t Enn vun Joyce sien Roman.
Bloomsday is jümmers an’n 16. Juni. Dat is de Dag, an den Joyce sien
Romanhelden Leopold Bloom dör Dublin tigern lött. Dat is keen
offiziellen Fierdag, man de eenzige Dag in de Welt, de sien Naam
vun en Romanhelden weg hett. Dat mutt een eerstmal namaken!
De Roman is an’n 2. Februor 1922 in Paris rutkamen un hett de
Literatur op’n Kopp stellt – nich blots de engelsche. Blots de plattdüütschen
Schrieveslüüd hebbt dor nich veel vun mitkregen.
Ik heff mal op Peter Hansen sien Plattsiet (www.niederdeutscheliteratur.
de) keken: Mang de plattdüütschen Böker, de 1922 nee
rutkamen sünd, sünd Titels as »Achtern Elvdiek« vun Ernst Behrens,
»Dat lustige Vördragsbok«, rugeven vun John Brinckmann –
mit twee »n«, un »Schummertied« vun Hans Ehrke – vun en
modernen Roman is dor wiet un siet nix vun to sehn! Nich mal
vun en Roman! Blots vun en Gesangbauk, Epistel, Lustspill, Spillwark,
Bild, Schwank, Komeedie, Gesangsposse, Volksmärchen,
Volksstück, Buernstück, Märchenspell, vun Märkenvertelln, lütten
Geschichten, vergnögten Döntjes, Vertellsels, Vertellen, Gedichten,
Läuschen, Riemels, Schnurren, Possen, Kinnerriemels,
Kirchenleder, Kasperschwänken, Rätsels, Sprüchwöör uvm.
Ole Gedichtformen nee opstellt hett för uns Hans-Hermann Briese.
Sien Gedichten – en Ghasél, en Rondell, ok en modern Rap-Gedicht
– hebbt wi geern afdruckt. Dat is wichtig, dat de Literatur ok
mal trüchkickt un sik besinnt, wonehm se herkümmt, anners gifft
dat keen Vörankamen. Trüchkieken dröff een, man stahnblieven
is verbaden. Wenn een övern Töllerrand kickt, is dat noch beter.
In de plattdüütsche Literatur gifft dat keen Ulysses, dat is schaad,
man Groth sien Quickborn un de is jümmers noch quicklebennig,
ok na 170 Johren noch. Un dat Allerschöönste is, Quickborndag
is nich blots eenmal in’t Johr, Quickborndag is jeden Dag – tominnst
för de Lesers vun uns Heften.

Veel Vergnögen bi’t Studeren vun düt Heft wünscht

Heiko Thomsen un Bolko Bullerdiek

Heft Artikel von: Bullerdiek, BolkoThomsen, Heiko