finnt ji düt Begröten beten kottaf? Leest man mol ünner »Blangenbi« no, wat dor achtersteken deit, un denn schrievt uns, wat ji dorto meent. De een oder annere hett sik as’t lett böös verfehrt vunwegen den Snack mit de »Klookschieters« un »Meckerbüdels« op den Titel vun Heft 1, un meent nu, wi wüllt gor keen Kritik mehr hebben. Heel un deel verkehrt! Wi sünd jo nu ok nich klöker as ji all un hoolt uns dor ok nich för. Kloor hebbt wi uns Menen un schrievt de ok, sünnerlich in de Rezensionen. Man dat blifft en Menen vun den Rezensenten un heet nich, dat dat nich ok noch anner Menen geven kann. De gifft dat, ok in uns Redaktion. Dor warrt männichmol orrig diskereert. Also diskereert geern mit un laat uns dat weten, wenn ji wat anners seht. Mag ween, ji köönt uns en Sicht wiesen, ut de wi dat noch gor nich bekeken hebbt. Nich jeedeen, de sien Menen seggt, is foorts en Klookschieter:sche. So nööm ik Lüüd, de dat jümmers beter weten doot, ok wenn se egens keen Ahnen un sik villicht noch nich mol orrig informeert hebbt. Un keen mol Kritik öövt, is dorwegen noch lang keen Meckerbüdel. Je mehr Lüüd mit jümehr Bidräg mitmookt, je bunter un beter warrt en Heft. Un dat ik dat nich heel un deel alleen tohoop klütern müss, hebbt wi de enkelten Delen vun’t Heft dütmol ünner uns opdeelt: Bolko Bullerdiek hett de Literatur tosomenstellt, Heiko Thomsen hett sik üm de Opsätz kümmert, Johanna Kastendieck hett de Rezensionen organiseert, Hannes Frahm weer för de Fundsaken tostännig un Christiane Batra hett as jümmers de Norichten sammelt. Ik segg al mol velen Dank an se all un ok an all de, de uns en Bidrag tostüert hebbt. Un bidde nich mucksch oder trurig ween, wenn wi dat mol nich foorts in’t Heft opnehmen köönt.

Nu wünsch ik veel Pläseer bi’t Lesen. Un schull jo wat nich no de Mütz ween: Nich argern, schrieven!

Ik wünsch jo un uns all Gesundheit un en verdreeglich Miteenanner.

Petra Kücklich

Heft Artikel von: Kücklich, Petra