dat Johr geiht toenn un wi warrt torüchdenken an 2020 as
dat Johr, as Corona uns faatkreeg. Man wi mööt nich bang
ween. Uns Plattdüütsch warrt dat gräsige Virus överstahn
un dat warrt wiedergahn mit Platt int neegste Johr, soveel
is wiss. Twors sünd vele Veranstalten afseggt worrn un dat
hett dütmal ok keen plattdüütsch Bökermess geven, liekers
sünd wedder niege plattdüütsch Böker rutkamen. Wenn ji
also op’n letzten Drücker noch en Geschenk för Wiehnachten
söökt, kiekt na bi de Rezensionen.
Wi vun’n »Quickborn« hebbt en CD opnahmen: Luuster
mol torüch. Dat is uns Johrsgaav. Wi hebbt dor Texten vun
fief Hamborger Schrieverslüüd tosamenstellt: Hertha Borchert,
Magreta Brandt, Hermann Claudius, Joachim Mähl
un Wilfried Wroost.
John Brinckman, de grode plattdüütsche Schrieversmann
ut Rostock, is vör 150 Johren vun de Welt gahn. Em to Ehren
fangt wi uns Literaturdeel dütmal mit en Geschicht vun
Wolfgang Mahnke an. Ji köönt in Meckelbörger Platt lesen,
woans de Drömer Mahnke mit Käpten Pött/John Brinkman
dör Rostock bummelt.
Ut Kiel hebbt wi en Rezension tostüert kregen. Man de is
länger un grundsätzlicher worrn. De Rezensent Jens Bahns
argert sik över den schludrigen Ümgang mit de plattdüütsche
Spraak. Uns dücht, dat sien Gedanken wichtig sünd.
Dorüm druckt wi dat ünner Opsätz af un hööpt, dat disse
Opsatz en Echo kriggt. Denn wi köönt nich jümmer dat
Loffleed von de plattdüütsche Spraak singen un togliek
sludrig mit ehr ümgahn. Un disse Jens Bahn hett ok noch
en Gedicht över dat »Pony Gesche« schreven un Heidrun
Schlieker hett dor Biller to maakt. Wi hebbt dat ünner »För
de Lütten« afdruckt, man wi glöövt, dat sik ok öllere Leser
doröver freit.

Frohe Wiehnachten för ju all. Blievt gesund un snackt düchtig
Platt.

Heiko Thomsen
Bolko Bullerdiek

Heft Artikel von: Bullerdiek, BolkoThomsen, Heiko