düt Heft is wat dicker worrn, as dat normalerwies de Fall
is, dat fangt al mit den Literaturdeel an. Wi hebbt teihn Texten
utwählt – vun ole Bekannte, man ok vun Schrieverslüüd,
de to’n eersten Mal dor mit bi sünd, to’n Bispill Nikos Saul,
Christoph Prang un Gerd Wohlenberg mit ehr Gedichten –
jeedeen op sien Oort wat Besünners. Wi hebbt so vele Texten
tostüert kregen (nich blots Literatur), dat wi dat gor nich
allens ünnerbringen kunnen. Man dat Schöne is jo, dat wi
denn dat neegst Heft meist al wedder tosamen hebbt.
Gifft natürlich ok wedder wat to’n »Klaus-Groth-Jahr« – to’n
letzten Mal. Wi hebbt twee Opsätz afdruckt, een över dat
Verhältnis vun Groth un Storm (un Groth sien hoochdüütsche
Gedichten) un de anner över de Vagels in Groth sien’
»Quickborn«. An’n 17. September geev dat en groten Festakt
för Groth in’n Plenaarsaal vun dat Landshuus in Kiel. Karen
Nehlsen weer dor un hett uns ehrn Bericht schickt.
Cord Denker hett en ›Fund‹ maakt un stellt uns Daniel Sanders
vör, de – jüst so as Groth – düt Johr sien‘ 200. Geboortsdag
fiern kunn, wenn he noch leven wöör.
De grode Lyrikerin Waltrud Bruhn is vör twintig Johrn sturven.
Doröver finnt ji enen Opsatz un een Erinnern. Wokeen
ehr kennt hett, kann sik op ehr besinnen. Wokeen ehr nicht
kennt hett, kann se kennen lehrn. Un beid köönt ehr Lyrik
ut’ Schapp nehmen un wunnerwarken, wo modern plattdüütsche
Lyrik ween kann.
De »Quickborn« graleert Dr. Peter Schütt to sien’ tachentigsten
Geboortsdag. Wi freit uns, dat he sik för Gott un de Welt
intresseert un dor jümmer ok wat för de Plattdüütschen bi
affallt. Dr. Reinhard Goltz hett sienen 65. Geburtsdag fiert.
Wi graleert em von Harten. Dat »Plattdüütschzentrum in
Leck« gifft dat 25 Johr un den »Bund Niederdeutscher Autoren
« 30 Johr – Hartlich Glückwunsch, maakt wieder so!
Natürlich hebbt wi ok wedder en Barg Rezensionen. Blangenbi:
2019 sünd mehr as tachentig plattdüütsche Böker op’n
Markt kamen, dat hebbt wi op de Plattdüütsche Bökermess
to weten kregen.
Frohe Wiehnachten un veel Pläseer bi’t Lesen vun uns Heft
wünscht
Bolko Bullerdiek un Heiko Thomsen

Heft Artikel von: Bullerdiek, BolkoThomsen, Heiko