Dat Institut för Qualitätsentwicklung an Scholen Sleswig-Holsteen IQSH harr an’n 26.10.2018 to en Lannesfackdag Nedderdüütsch no Kiel laadt. Dat weer en Fortbillen för Schoolmeisterschen un Schoolmeisters, de sik in’n Ünnerricht mit Plattdüütsch befaat. Man nich blots ut Sleswig-Holsteen, ok ut Bremen, Neddersassen, Meckelnborg-Vörpommern un Hamborg weern Lüüd dor. Wunnerbor organiseert harr dat Karen Nehlsen, Lannesfackberatersch Nedderdüütsch un Koordinatorsche för Regional- un Minnerheitenspraken in Sleswig-Holsteen. Se begrött de Deelnehmers glieks op Platt.

An düssen Nomiddag geev dat heel interessante Vördrääg, de mehrsten sogor op Platt. So verkloor Robert Langhanke vun’e Europa-Universität Flensborg, woso een an’e Scholen nich blots dat Snacken man ok dat Schrieven op Platt lehren schull un dat dat mit dat Schrieven geern glieks tohoop mit dat Hoochdüütsche loosgahn dörv. Heiko Frese vun’e Lannesschoolbehörd Neddersassen wies, wat’n grote Schangs dat is, wenn Kinner vun lütt op an mehr as een Spraak lehrt. Un he stell den Kinofilm „Ritter Trenk op Platt“ vör, de jüst mit’n plattdüütsche Synchronisation in’e Kinos komen weer. Dr. Birte Arendt und Ulrike Stern vun’e Ernst-Moritz-Arndt-Universität Griepswoold stellen mit Linguistic Landscape en Projekt vör, bi dat Studenten oder Schölers loosschickt warrt ruttofinnen, woans een in’e Gegend noch schreven Plattdüütsch finnen kann, as op en Tofel dat Ankünnigen, wannehr een Kroog op hett, plattdüütsche Nooms vun Ladens un Stroten oder Rekloom op Platt. Dat kann een denn fotograferen un mit’n besünner Programm in’t Nett hoochladen, dat anner Lüüd dat ok finnen köönt. Robert Langhanke, ok Vörsitter vun’e Klaus-Groth-Sellschop, vertell, wat allens ploont is in’t Klaus-Groth-Johr 2019 to’n 200. Geborsdag vun den groten plattdüütschen Schrieversmann un Dr. Anke Rosbach, ok vun’e Europa-Universität Flensburg, stell dat Musical „Klaus Groth in Lüttenheid“ vör, dat se extra dorför schreven hebbt un dat een bi ehr kriegen kann.

In lütte Workshops kunn een verscheden Ideen rund üm’t Platt lehren utproberen. Dat güng üm’t Schrieven op Platt, dat Bruken vun dat Lehrbook „Paul un Emma un ehr Frünnen“, man ok üm lütte Theoterstücken un Musik un üm moderne Hölpsmiddel as Apps & Co. Dor wöör gau mol en Popsong in‘t Plattdüütsche överdregen, mit Heiko Frese probeern wi en Reeg lütte Spelen ut, mit de een Schölers to’t Plattsnacken bringen kann, un vun Thorsten Börnsen hebbt wi lehrt, woans een op Plattdüütsch rappt.

An Bökerdischen vun’n Sleswig-Holsteenschen Heimatbund, Plattschapp un Quickborn-Verlag kunn een sik glieks mit Materiol indecken. Un för musikalsche Begleitung hett Gerrit Hoss sorgt, wat bi de Deelnehmers bannig goot ankeem.

Op mi hett dat bannig Indruck mookt, wat dor in Sleswig-Holsteen in’e Scholen allens op Platt löppt. An 30 Grundscholen un 7 Sekundarscholen gifft dat Plattdüütschünnericht.

Man heel un deel grootordig finn ik, dat meist de hele Veranstalten op Platt afleep un nüms hett sik bekloogt, dat he oder se dat nich verstünn. Sowat dä ik mi för Hamborg ok wünschen un ik hoop, dat ik tokomen Johr an’n 25.10. wedder Tiet heff, to’n Lannesfackdag in Sleswig-Holsteen hentofohren.

Heft Artikel von: Kücklich, Petra