Ünner dat Motto Groth & Lütt drepen sik vun’n 20.09. bet to’n 22.09.2019 Schrieverslüüd un Plattfrünnen ut heel Plattdüütschland in Bämsen (Bad Bevensen) to de 72. Bämsen-Dagfohrt.

An’n Freedagnomiddag güng dat no en hartlich Begröten vun de Vörsittersch Marianne Ehlers loos mit den Film Ritter Trenk op Platt. Dor weern ok en poor lüttere Kinner komen, man de gröttste Deel vun’e Tokiekers weern de Lüüd vun’e Dagfohrt. Wi hebbt uns freit an den feinen Film un höögt över den plietschen Jung, de dat mit veel Kroosch un Hölp vun gode Frünnen vun en Liefegen to’n Ritter bröcht hett. Sünnerlich Spooß hett dat ok mookt, de een oder anner plattdüütsche Synchronstimm weddertokennen. Achterno föhr Karen Nehlsen en interessantet Interview mit Mila Nele Borchers, de plattdüütsche Stimm vun Trenk sien Süster Mia Mina, un Johann Frese, de den Rittersöhn Zink sien Stimm geev.

No’t Avendeten güng’t denn wieder mit en heel besünnern Klaus-Groth-Avend: Marianne Ehlers un Volker Holm föhren bannig interessant un vull Afwesseln dör Leven un Wark vun den groten Dichtersmann un drogen dorbi ok en Reeg vun sien Gedichten vör. Dorto sung Christoph Scheffler sien Vertonen vun Groth-Gedichten. Wi hebbt en Barg över Klaus Groth to weten kregen. Dorbi weer dat heel kottwielig un en wunnerbore Stimmung. Beter harr een dat nich moken kunnt. (op dat Foto: V. Holm und M. Ehlers)

An’n Sünnavend geev dat no de Johrsversammeln vun den Vereen Bevensen-Tagung e. V. interessante Vördrääg: Niels Tümmler vertell över Platt in de sozialen Medien un wies poor Bispillen för plattdüütsche Bidrääg bi Facebook. Robert Langhanke vun’e Europa-Universität Flensborg stell de Klaus-Groth-Gesellschop vör. Vun Ulrike Stern vun’t Kompetenzzentrum för Nedderdüütsch an’e Universität in Griepswoold kregen wi wat över Nedderdüütschdidaktik to hören un Christiane Ehlers vertell, woans se mit dat   Nedderdüütschsekretariat un den Bunnesraat för Nedderdüütsch Politik för Platt mookt.
(op dat Foto links: Christiane Ehlers, rechts: Robert Langhanke)

An’n Nomiddag kunn jeedeen Deelnehmer, de sik dorför anmellt harr, sien egen Text ‚Op de Kist‘ vördregen. Man dat dörv nich länger as veer Minuten duern. Düt Johr harrn 22 Lüüd en Zeddel mit ehrn Noom in den Büdel smeten, ut den Wienke Holm nu een no’n annern wedder ruttrock. Dat weer en Rekord. De mehrsten hebbt dat mit de veer Minuten ok goot henkregen, man en poor wullen un wullen keen Enn finnen, ofschoonst de Klock al lang pingelt harr. Modereert hett dat düt Johr to’t letzte Mol Hans-Hermann Briese. He frei sik över de groot Vermaak un kreeg en extra Applaus un Dank för all de Johren, de he dat mookt hett. (op dat Foto: Wienke Holm und H.-H. Briese)

Wieder güng dat denn mit dat ‚Literarische Kleeblatt‘. Dorto hören düt Johr Carl-Heinz Dirks ut Emmen, Heiko Frese ut Lümborg, Petra Kücklich ut Hamborg un Ulrike Stern ut Schwerin. Se stellen de literarischen Warken „Bullerdiek sien Buddelbreven“ (Prosa un Lyrik) vun Bolko Bullerdiek, „Is lütt Schütt al dor?“ (Lyrik) vun Peter Schütt un „Ligusterdrööm“ (Prosa) vun Dietrich H. Schmidt vör un weern sik no en kotte Diskussion eenig, all dree Böker lohnt dat Lesen. För dat Schoolbook „Platt mit Plietschmanns“, rutkomen bi’n Hinstorff-Verlag, geev dat orrig Kritik.

Mit en fein Kunzeert vun‘t Otto-Groote-Ensemble ünner dat Motto „Tohuus in’t blaue Lücht van d‘ Norden“ güng de Dag toenn. (Foto: Marianne Ehlers un dat Otto-Groote-Ensemble)

De plattdüütschen Gottsdeenst mit Pastoorsche Gisela Meister-Römmer ut Tönning an’n Sünndagmorgen in’e Dreekönigskark in Bämsen weer goot besöcht.

Dorno geev dat in’t Kurhuus noch en Fierstünn. De Lüttjepütt-Pries, drogen vun de Sporkassenstiftung Neddersassen, wörr an den Vereen „Platt und Friesisch in der Schule e. V.“ vergeven för den Film „Ritter Trenk op Platt“. Niels Tümmler, de twete Vörsitter vun’n Vereen Bevensen Tagung e. V. see in sien wunnerbor Loffreed, he harr den Droom, dat so as dat Filmprojekt as lütte Plant anfungen hett un jümmer wieder wussen is, ok de plattdüütsche Plant an sik jümmer wieder wassen warrt.

Dat weern wedder wunnerbore dree Daag vull Beleven, Uttuschen, Kennenlehren un Snacken un sünnerlich: vull Plattdüütsch. Heel velen Dank an all, de doran mithulpen hebbt!

Fotos: Petra Kücklich

Heft Artikel von: Kücklich, Petra