FRÜNDSCHAFTS-SPEEL
Een Komödie vun Stefan Vögel
Plattdüütsch vun Heino Buerhoop
Ohnsorg-Premiere 26. Februar 2017

Wenn in een’ Text oder, as in düssen Fall, in een’ Speelstück sünnerlich vele hoochdüütsche Wöör opdükert, denn liggt dat op de Hand, dat sick dat üm een Thema dreiht, wo sick de plattdüütsche Literatur noch nich üm kümmert hett. „Unfruchtbor, Samen, Samenspender, Gene“ sünd so’ne Wöör, vun de dat in Stefan Vögel sien Theaterstück „Fründschafts-Speel“ bloots so wimmelt. Un dat weiht een’n denn so’n beten gediegen an.
Hier is nu de Geschicht: Leon un Romy kriegt keen Kinner. Dat wasst sick je länger un mehr to een groot Manko ut. Mag ween, een Kind weer de eenzig Chance, üm de Eeh to retten. Liggt dat an Romy? Se is fast dorvun öbertüügt dat se Kinner kriegen kann un hett keen Problem dormit, sick dat vun den Gynäkologen un toseggen loten. Leon is fast dorvun öbertüügt, dat he Kinner moken kann, dat hebbt de Mannslüüd in sien Sippschaft noch allemol tostann kregen. Gegen een Test sett he sick mit Hannen un Fööt to Wehr.
De beiden leewt jo nu awers nich alleen op de Welt, nee, se hebbt een’n groten Krink vun beste Frünnen üm sick, Football-Frünnen. De kriggt dat jo nu mit, wat mit de beiden los is un mookt sick ehre Gedanken. Weer doch een Jammer, wenn de beiden uteenanner loopt un de ganze lütte Vereen dor ünner to lieden harr un villicht uteenanner flöög. Babs, de Fru mit dat warme Hart för dat Lewen, de mit Bernd verheiroot is un al twee Kinner hett, gifft Romy den Raat, se schull dat doch mol mit een annern Mann versöken… Nee, nich mit een’ annern in’t Bett gohn, nee, ganz neutral öber Samen-Spende…
Babs, heff ick jo al seggt, is mit Bernd verheiroot un se wünscht sick noch een drütt Kind. Wat nu Bernd is, de Mann mit de goden Gene, de hett ganz fröher in de School blangen Romy seten, hett ehr ümmer anhimmelt, hett dat bloots nich öber de Lippen bröcht, dat he ehr leev harr. Un nu hett he eben sien Babs leev un siene Kinner, un dat is sien ganze Welt, wenn man mol vun den Football afsüht. As Romy em batz den Wunsch an den Kopp schmitt: „Mook mi een Kind!“ – dor is dat för em as beber de Eer. Nee doch, ganz neutral, as Samen-Spender…
Kriegt de Tokiekers awers denn doch nich to weten, woso Romy noh een Tied warraftig schwanger is. Mööt jo ok nich all’ns weten! – Na, Leon hett dat endlich, endlich öber sick bröcht, den Test to moken un he weet nu, he kann nich Vadder warrn, nie nich. Un he is nu – noh passlich Bedenk-Tied – ok willens dat mit de Samen-Spende in’t Oog to foten. Loot em man noch een beten Tied! – Nee, Romy stormt op em in, se kann dat nich för sick behooln: „Ick mook di to’n glücklichsten Mann op de ganze Welt: Du warst Vadder!“ As harr de Blitz em dropen, steiht Leon dor, em fehlt de Wöör, denn dat is kloor, vun em kann dat Kind nich sien.
Dummerwies koomt nu ok noch all de „besten“ Frünnen öberto, un de Saak kriegt nu sowat vun Dynamik un Dramatik, dat de Tokiekers gor nich so gau kieken köönt. Babs, de Romy doch den warmhartigen Tipp mit den frömden Mann gewen harr, ward to een giftsprütten Furie: Awers doch nich mit ehr’n Mann!!! – Leon un Robby kriegt sick in de Wull, Leon harr mit Robby sien Frau anbändelt, villicht üm een’n Utgliek för sien Manko to hebben. Bernd fallt üm, as he de beiden Kontrahenten uteenanner bringen will, un all glööwt se för een’n Ogenblick, he is dood… Toletzt höllt Romy een wunnerbore Reed öber de minschliche Schwachheit: All hebbt wi unse Schatten-Sieden, all hebbt wi een Sünden-Register, mol open, mol achter de Hand… Jo, un du warst dat nich glöben, düsse Reed, düsse Predigt, bringt den ganzen Hümpel Lüüd wedder to Verstand: Wi sünd jo doch egens beste Frünnen! Und – is doch all’ns minschlich!

Werkeen mitspeelt hett: Tobias Kilian as Leon, de Mann, de nich Vadder sien kann. – Birte Kretschmer as Geschäftsfru mit den ganz groten Kinner-Wunsch. An’t End mutt se wegen den dicken Buuk in’n Watschelgang lopen. – Markus Gillich as Bernd, de Mann den de Natuur so utrüst hett, dat he egens een Kind noh dat anner moken kunn. (Een Glanzrull) – Tanja Bahmani as Babs, de Fru, de Romy den gülden Tipp gifft mit den Samenspender. – Tim Ehlert as Robby, de as HSV-Fan dat ganze Theater to’t Gröhlen bringt. Achter sien Rügg hett sien Fru een Techtelmechtel mit Leon.

Anmarken: Een witzig un spritzig Stück üm een Thema ut de Dunkel-Eck, öber dat sick mehr Minschen Gedanken mookt, as man glööwt. De Autor hett dat Stück in de Football- un in de Footballer-Welt stellt, mag ween, he süht dor een symbolisch Tosomenhang. Dat Bühnenbild is een Tor mit de Netz-Bespannung un dor achter is denn dat Tribünen-Rund to sehn. Ümmer wedder ward op Football anspeelt. Un wenn dor an dacht ward, dat de HSV vör een poor Doog een 0 to 8 Klatsche vun den FCBayern kregen hett, denn johlt dat ganze Theater: Sowat vun aktuell is dat Stück! – Wenn de Szenen ümstellt ward, denn mookt de Schauspeler dor een Ballett ut, danzt mit Stöhl un Dischen, un kriegt dorför Extra-Applaus.

Heft Artikel von: Denker, Cord