Sünnavend, den 23.04.2022 hett ’t na veer Johren endlich wedder en Plattdüütsch
Dag in Hamborg geven. In ’e ganzen Stadt kunnen intresseerte
Lüüd bi 40 plattdüütsche Veranstalten tohören, tokieken un ok mal
mitmaken, t.B. Föhren dör ’n Michel, dör de Speicherstadt oder dör dat
Gorch-Fock-Huus, Leder un Gedichten in Lichtwarksaal, en Middagsandacht
in’n Michel un en Utstellen in ’e Nedderdüütsche Bibliothek un en
poor Lesen in ’e Staats- un Universitätsbibliothek un un un… Prominente
Lüüd hebbt ebenso mitmaakt, as ok en Barg annere Plattsnackers.
Werner Momsen wöör dorbi mit »Minsch blieven«, un Gerd Spiekermann
hett wat ut sien Böker vertellt. Un ok Benita Brunnert, Wiebke Colmorgen, Heiko Gauert un Uwe Michelsen hebbt mitmaakt, blots, üm mal en poor Lüüd to nömen.
Man ok de Quickborn-Verenigen hett an dissen besünnern Dag mitmaakt.
En Veranstalten hett »Luuster mol torüch« heten. Dor hebbt Lüüd vun ’e
Redaktschoon – Christiane Batra, Johanna Kastendieck, Petra Kücklich,
Sylvia Pein-Dethloff un Heiko Thomsen – de sünst de Tietschrift Quickborn
trecht maken doot, Texten vun fief Hamborger Schrieverslüüd (Hertha Borchert, Magreta Brandt, Rudolf Kinau, Joachim Mähl und Wilfried Wroost) vördragen. Disse Utwahl an Texten is 2020 al as en CD bi’n
Quickborn-Verlag rutbröcht worrn un wöör de Johresgaav för de Maten
vun ’e Quickborn Verenigen för nedderdüütsche Spraak un Literatur e.V.
Dat sünd Texten, de een ehr selten to hören kriggt, man nu wöör dat
mööglich in ’e Zentralbibliothek vun de Bökerhallen in Hamborg.
Un denn geev dat noch en Lesen in en Naverschopsdrapen in Langenfeld
bi de Baugenossenschaft Hamburger Wohnen eG mit Sonja
Dohrmann, ok en Maat ut ’e Quickborn-Redaktschoon. Se hett ehr
egen Texten vörleest. Welke wöörn al mal in plattdüütsche Anthologien
oder woanners rutbröcht. Se harr aver ok noch Texten, de bito
noch keeneen höört oder leest harr. För de Lüüd vun ’n Quickborn
wöör disse 3. Hamborger Plattdüütsch Dag en groten Erfolg, man
ok vun anner Steden hett man blots Loff över dissen Dag höört. Un en
Besöker hett an’n Een meent: »Dat maakt Lust op mehr. Ik frei mi al
op den neegsten Hamborger Plattdüütsch Dag!«
Sonja Dohrmann
Heft Artikel von: Dohrmann, Sonja