Wokeen vun all de Schrieverslüüd, de jedet Johr bi den
Schrieverwettstriet vun’n NDR mitmaken doot, kinnt
dat nich, man luert so af Midde Januor hibbelig op dat nee
Thema. Un denn warrt dat endlich in de norddüütschen
Medien bekannt maakt. Dat is denn so as’n Paukenslag.
Nu geiht los! Annerthalv Sieden, Schriftgrööt 12 Punkt,
Zeilenafstand 1,5. Dat is nich eenfach, ob so en Läng oder
veelmehr Kört en richtig Vertellen mit en vernünftig Hanneln oder en spannen Bogen
hentokriegen. Keen Woort to veel schrieven, allens genau
op den Punkt bringen. Ob de Text to’n Högen, to’n Nadinken,
to’n Opregen, to’n Besinnen ween schall, dat is egal,
blots mutt man vörher bedinken, in welke Richt de Text
an’n Enn föhren schall. Männich een kann glieks wat mit
dat ne’e Thema anfangen un schrifft furts los. Annere
töövt fast bit to’n Schluss, dat is jümmer de letzte Dag
in ’n Februor, dorna dröfft man keen Text mehr insennen.
Un wenn’t endlich an’t Schrieven geiht, denn schrifft
man, un schrifft… Oftens veel to veel un mutt denn hier
un dor Wöör strieken oder de Sätz so ännern, dat nix
to veel is, aver man den Text noch goot verstahn kann.
Denn gifft dat villicht ok en Leser op Proov, de Fehlers
söcht. Wenn an’n Enn allens passt, kann de Text afschickt
warrn. Un denn luert man op de Naricht, ob man to de
26 besten Schrievers hört un in den Vertell-doch-mal!-
Sammelband opnahmen woren is. Dat warrt man Anfang
bit Midde April gewohr. Eenige ut de Quickborn-Redaktschoon
maakt ok jümmer wedder mit, wiel dat so’n
Spooß maakt. Un wi freit uns natürlich bannig, wenn ok
mal wedder een vun uns dorbi is. Denn sünd wi heel un
deel gespannt, ob de denn ok ünner de fief Besten kamen is un bi de
Matinee in’n Ohnsorg-Theoter op de Bühn kamen dröfft. Neven Ruhm
un Ehr gifft dat dor ’n Batzen Geld un en Blomenstruuß. As wi gewohr
wören, dat uns Redaktschoonsmaat Heiko Thomsen to’n tweten Mal
mit en Text in’t Book kamen is, hebbt wi för em de Duumen drückt und
drückt un drückt. Un tatsächlich kunn he dit Mal de Trepp na de Bühn
hochstiegen, denn he hett den tweten Pries mit sien Text »Wi mööt hier
rut!« wunnen. Dat Thema vun de Geschicht is Quarantäne ut de Sicht
vun en Coronavirus. Bi de Matinee in’t Ohnsorg-Theoter an’n 19.06. is
sien Text vun den Santiano-Sänger Axel Stosberg vörlest worrn. Dat
Duumdrücken hett sik lohnt un de Redaktschoon freit sik för Heiko un
wi seggt: Hartlichen Glückwunsch!
Man is ja kloor, dat wi ok de fief annern Schrieverslüüd to jümehr Priesen
graleert: Wolfgang Krischke ut Hamborg hett den eersten Pries
mit sien Text »Doden Winkel« wunnen. Holger Wittschen ut Weyhe
kööm mit »Levenswunner« op den drütten Platz, Martha-Luise Lessing
ut Trappenkamp hett för »1962« den veerten Pries kregen un Regine
Wroblewski ut Ollenborg mit »De anner Siet« den föfften. Un denn gifft
dat ja ok noch den Ünner-18-Pries. De güng dit Johr an Ronja Sievertsen
ut Viöl, de mit ehr Geschicht »Dat Leven fangt richtig an« övertügen
kunn. An all: Hartlichen Glückwunsch!
Heft Artikel von: Dohrmann, Sonja