„Die Wanze“ heet dat Stück, dat in’n Junimoond op Hooch- un Plattdüütsch op de Studiobühne vun’t Ohnsorg-Theoter to beleven weer. Man egens is he gor keen Wanz man en Käver, verkloor Muldoon, de beste Privootdetektiv in‘n helen Goorn. Speelt wörr „De Wanz“ vun Sven Brorman. Jüst so as all de annern Krabbeldeerten, de in dat Stück vörkemen: Dor weer de Mistkäver Dixie, Barmann in „Dixies Bar“, Draapstell un Informatschoonsbörs vun’n Goorn. Denn geev dat de stöltern Stuvenfleeg mit en stüttig Lengen no Zucker. De Regenwörm Dix un Dax weern vördem mol een Worm un alltiets an’t Strieden. Verscheden Miegeemken kemen vör, as de Keunigin, egolweg an’t Eierleggen, de veniensche Böverste Krak un en smucke junge Miegeemkendeern. Wepsen un en Spinn dükern ok op. Un all düsse Deerten geev Sven Brormann ehr egen Charakter, as Deert un as Person in dat Stück. As Kostüm deen meist blots en Brill, Hoot oder Haarspang. De Rest weer Schauspeel, bannig grootordig mookt!
Wanz Muldoon weer ok de Verteller vun de Geschicht. De vertell he op Hoochdüütsch. So wüssen ok Lüüd, de vördem keen Platt kunnen, jümmers, worüm dat güng. Snackt hebbt de Krabbeldeerten denn Platt. Man tohoop mit de wunnerbore Mimik un Gestik weer dat ok för Nich-Plattsnacker keen Problem, allens mittokriegen. Mien Dochter hett sik över dat Stück jüst so höögt as ik. As lütt Hölp geev dat op den Programmzeddel, den een an’e Gardroov kregen hett, en lütte List vun Översetten vun de „Insektensprook“ (Platt) no Hoochdüütsch. Dor weer to lesen wo all de Krabbeldeerten op Platt heten. Un denn stünn dor de Översetten vun so schöne plattdüütsche Wöör un Utdrück as: „All up stee!“, „kommodig“, „snaaksch“ un „opsternaatsch“.
In dat Stück hett Privootdetektiv Wanz Muldoon den Opdrag kregen, en Grupp opsternaatsche Miegeemken to beluern. De verstunnen sik mit eens as enkelte Individuen, nich blots as Deel vun’n den Stoot. Man bi sien Ünnersöken kreeg he ruut, dat dor wat veel Legeret in Gang weer: De veniensche Böverste vun’e Miegeemken-Armee ploon, de Keunigin aftosetten un dör sien egen Keunigin uttotuschen. So wull he de Macht in helen Goorn kriegen. Dor müss Muldoon en P vörsetten!
Mit de Froog, wat dat bedüden deit, sik vun de Gemeenschop aftosetten, hett düt Stück ok en nadenkern Achtergrund. Man as Hauptsook beed düt Stück, dat as Uttuuschgastspeel vun’t Stootstheoter Ollenborg no Hamborg komen is, en gode Stünn Spooß pur.
Heft Artikel von: Kücklich, Petra