Lachen is de best Medizin, heet dat. Een bruukt dorto nich eerst to’n Doktor gahn. Dat lütt Book „De Mallbüdel 8“ is denn ok rezeptfree to kriegen. Op meist hunnert Sieden sünd Witzen ut de Senden „De Plappermöhl“ tosamenstellt. „De Plappermöhl“ is de öllst plattdüütsche Radiosenden, löppt vun 1983 an, jedeen letzten Sünnavend in’n Maand (19:05 – 20:00 Uhr) op NDR1 Radio MV. Susanne Bliemel un Thomas Lenz modereert.

Indeelt is dat Book in de Kapitel: »Ordnung möt sien«, »Kinner leigen nich«, »Schöne Bescherung«, »Hei un sei un dusend Frågen«, »Lüd gifft dat…«, »Vun schwienplietsch bet bannig mall…«, »Wat’n Buerntheåter«, »DDR – lang is’t her!«. Mit een Vörwort vun Rainer Schobeß un afsluten Informationen to Autorin, Illustrator, Plattdüütsch op NDR1 Radio MV un den Verlag, en runde Saak. Bi de Witzen kriegt jedeen sien Fett weg, Oolt un Jung, Mann un Fro, Buer, Lehrer oder Polizist, Schotten, Russen oder Meckelbörger. Mal achtersinnig, duppeldüdig oder stoffdröög. Mal goot verpackt, mal kott un knapp. En bunte Mischen, de höllt wat se versprikt.

Wat opfallt is de Schrievwies mit å un œ, un de Utdruck Nors. Dat sünd Meckelbörger Egenorten. Dat dat mit de Satzteken, sünnerlich bi de wörtlich Reed, nich jümmer stimmt un de Renter (S. 62) dat n to wenig hett, dat Kananda (S. 66) to veel hett, is argerlich.

Man du schasst di nich argern. Lachen is beter. Hier een vun de köttsten Witzen ut dat Book:

„Du Susanne?“ „Jå…“ „Eigentlich wull ik ′n Witz œwer de Düütsche Bahn måken. Œwer ik weit nich, ob de ankümmt.“

Susanne Bliemel: De Mallbüdel 8, De besten Witze ut „De Plappermöhl“. NDR1 Radio MV / Tennemann, Schwerin 2020. Taschenbuch, 106 Seiten. ISBN 978-3-941452-79-4

Heft Artikel von: Twenhöfel, Christl