»All disse Klischees« – weer mien eerst Indruck: Wenn Mudder nee
seggt, fraagt wi Vadder; de Hund jagt den Postbütel usw. Man dat is ja en
Book för lüttere Kinner. De weet dor noch nich so veel vun af un so warrt
jüm doch künnig maakt, wat dat nich jümmer blots Spooß maakt, wenn en
Hund in’t Huus is.
De dree Kinner vun Familie Lindemann wünscht sik en Hund. Mudder
tellt op, wat dorgegen steiht. Kloor dat doch en Hund in’t Huus kummt,
Benni. Benni is gelehrig. Man denn un wenn kriggt he Grappen in’n Kopp. He
schall al trüch in’t Tierheim. Man dor hett de lütt Sarah Malöör. Wenn Benni
dat nich mitkregen un Alarm bellt harr, harr dat leeg utgahn kunnt. So is
he denn de Held. Un dörv blieven. Dat lütt Book vertellt nich blots de
Geschicht. Twüschendörch un an’t Enn gifft dat Radels, Söökbiller. De
Biller sünd mit klore Linien in klore Farven maalt. De enkelten Lüüd sünd
weddertokennen. Freid oder Arger is an de Gesichter aftolesen. Wo Benni
ween is, wiest sien Foottappen.
De Text is in Münsterlänner Platt schreven. Man dat lett sik goot lesen.
Mien Enkelin (12) hett dat ahn natofrogen henkregen. Schull denn ok keen
Problem för Vadder un Mudder ween. Dat sünd kotte Sätz, eenfach utdrückt.
En Book nich blots för de Region.
Hildegard Tölke: Benni use Held; Illustrationen von Bettina Kumpe.
Lohne: Selbstverlag Hildegard Tölke 2022, 32 Seiten, 14,8 x 14,5 cm,
www.hildegard-toelke-plattdeutsch.de
Christl Twenhöfel
Heft Artikel von: Twenhöfel, Christl