An’n 11. Juni 2022 weer dat wedder sowiet: Drepen vun’e plattdüütschen
Schrieverslüüd in’n Möllner Stadthauptmannshoff! So richtig mit tohoopsitten
un snacken twüschendrin. De Veranstalters, de Stiften Herzogtum
Lauenborg un dat Nedderdüütschzentrum Holsteen, hebbt dat
wedder allerbest organiseert. To Middagstiet un Koffiedrinken kunnen
wi bi wunnerbor Wedder direktemang an’n See sitten, uns uttuschen un
uns de lecker Spargelcremesupp oder Gulaschsupp un later den Koken
smecken laten.
En Programm geev dat natürlich ok. Begrött wörrn de Deelnehmerschen
un Deelnehmers op Platt vun den Präsidenten vun’e Stiften Herzogtum
Lauenborg Klaus Schlie, den Kreispräsidenten vun’n Kreis Herzogtum
Lauenborg Meinhard Füllner un vun Thorsten Börnsen, Baas
vun’t Nedderdüütschzentrum Holsteen. Wi kregen to weten, dat de Tall
vun’e aktiven Plattsnackers in Sleswig-Holsteen siet Johren nu wedder en lütt beten
no boven gahn is un dat Plattdüütsch in Sleswig-Holsteen ok ut’e Politik orrig
Stütt kriggt. Un kloor sünd ok de Schrieverslüüd dor wichtig för, dat se moderne
Texten op Platt levert, de vun’e Lüüd denn leest warrn köönt. Thorsten Börnsen vertell vun sien Rull as Plattaktivist. He sett sik dorför in, dat de plattdüütsche Spraak
in all Rebeten vöranbröcht un sünnerlich an de junge Generation wiedergeven
warrt. En groot Probleem sünd no sien Menen de Plattdüütschen sülvst, de sik un ehr
Sprook foken nich so wichtig nehmt un sik lütter mookt as dat nödig deit. Dorbi mööt
wi föddern, dat uns Sprook de nödige Stütt un Bedüden kriggt, dat se
överleven kann! Sünnerlich wichtig sünd dorbi de jungen Lüüd in’e Scholen,
man ok in jümehr Freetiet, un de Medien, wo dat Plattdüütsche dör
Aktionen as »Funklock stoppen« en grötter Gewicht kriegen schall.
Denn geev dat noch en Vördrag vun Sonja Wolf ut de Lannsverwalten.
Se vertell vun’e enkelten Steden in’e Verwalten, de wat mit Plattdüütsch
to doon hebbt. Dor heff ik wunnerwarkt, woveel dat sünd.
Achteran geev dat en lütte Diskussion, woneem een all de plattdüütschen
Schoolmeister:schen för den Plattdüütschünnerricht nehmen schall. Musik
geev dat vun Inge Lorenzen ut Noordfreesland.
No en lütte Koffiepaus güng dat wieder mit junge plattdüütsche Poetryslam-Texten
vun Gesche Gloystein. Se is Baas’sche vun’e Facksteed Plattdüütsch bi de Emsländsche Landschop. Ehr Texten sünd nodenkern un doch vull Knööv, se hett
wat to seggen un mookt dat so, dat dat ankümmt un hangen blifft, tominnst bi mi.
So vergliekt se de Plattdüütsche Sprook mit en Stück Porzellan, dat een as kostbor
Erinnern vull Bedüden wohrt un pleegt. Ehrn Text »Een Dag« köönt ji in dat Vertell
doch mal-Book »Fief vör twölf« vun 2020 nolesen. Dor geiht dat üm de Aspekten
vun’e Melkweertschop: üm de Plegersche, de nich noog Tiet hett för
de enkelten Patienten un dorbi nich noog Geld verdeent, man villicht
liekers lütt beten mehr för Melkprodukten ut de Region utgeven dä, üm
den Melkbuern, de för sien Melk nich noog kriggt, dat he mehr op dat
Wohl vun sien Deerten achten kunn, üm de Molkereekunzernen, de de
billige Melk, de hier nich bruukt warrt, as Melkpulver no Afrika verkopen
doot, un üm den Buern in Afrika, de dor mit sien Melk ok nich noog
verdeent, üm sien Deerten un sien Familie dörtobringen, un dorüm, dat
dat allens jichtenswo tosomenhangt. Un ok de Text »In’t sülvige Boot«
vermahnt, dat nich een för sik alleen man blots wi all tosomen, wenn wi
opeenanner Acht geevt, en Tokunft op düsse Eer hebbt.
No de Middagspaus weren denn de Schrieverslüüd an’e Reeg. 16 Autoren
ut heel Noorddüütschland hebbt dor jümehr Texten vörstellt. Dor geev dat
wedder en Reeg plattdüütsche Dialekten to hören un en bunten Rükelbusch
an Themen, de in’e Texten opgrepen wörrn. Leest wörr jümmer in twee
Gruppen to glieke Tiet. So kunn een jümmers blots de Hälft vun de Texten
hören. De Entscheden weer foken bannig swoor, wokeen een nu toluustern
wull. Man op de Nettsteed vun’t Nedderdüütschzentrum Holsteen ünner
köönt wi all de Texten in Roh nochmol nolesen. To’n Bispill den Text
vun Petra Jessen ut Barmstedt, de jüst den Wettstriet üm »En Leed för den
Kring Sebarg« wunnen hett. Se schrifft över en Sportlersche vun’e Paralympics,
de dör ehr Kroosch, sik in’e sozialen Medien to wiesen, ok anner
Minschen hölpt, to ehrn Lief to stahn. Brigitte Fokuhl ut Lübeck vertell
vun »Wladimir un de Volksleder« un versöch to verkloren, woso dat ehrn
Noom mol mit »F« un mol mit »V« gifft. Niels Tümmler, Baas vun’t Jöögdzentrum
Bämsen, harr dat Gedicht »Sitten an eyn stroom« mitbröcht
un Silke Frakstein ut Hamburg vertell, woans se sik in’n Urlaub mit ehr
Fohrrad verbiestert hett un vun ehr Tiet as Deenstdeern in Timmendörp.
Vun Marlou Lessing ut Trappenkamp geev dat »duckdalbenlyrik« ut
verscheden Stilepochen un en beten anneret Märken. Hannes Frahm ut
Flensborg wies in sien Geschicht vun Opa un Enkel, dat Lesen ok bi de
niegmoodschen Computer- un Konsolenspelen en grote Hölp ween kann.
Dorto geev dat blangenbi noch en lütten Wettstriet twüschen em un Manfred
Sahm, den Moderator vun düsse Grupp. De vertell, to sien Schooltiet weren 48
Schölers in een Klass, man dat kunn Hannes Frahm mit »Bi mi 56!« denn locker
utsteken. Sien tweten Text vun en lütt Deern, de in’n Pool vun’n Navergoorn
verdrunk, güng bannig to Harten. Sylvia Glismann ehr Texten över de Jagd no en
Katteker, de sik in’t Huus versteken harr, un de Maleschen bi’t Köpen un Transporteeren vun en Ledder weren denn wedder wat to’n Högen. Nodem de Letzt ut de beiden Gruppen ehrn oder sien Text vördragen harr, weer de Autorendag
denn al vörbi un wi moken uns so een bi een mit’n lüttet »Danke«
un »Adjüüs« op’n Weg. Ik harr en lütten Utklang nett funnen. Man mag
ween, de een oder anner, de vun wieder weg keem, hett sik geern al vör
Klock söss op’n Padd mookt. Un wenn allens goot geiht, köönt wi uns jo
tokamen Johr in Mölln weddersehn.
Heft Artikel von: Kücklich, Petra