Reimer Bull hett mal seggt: De Straten sünd vull vun Geschichten.
Wi kriegt ehr bloots nich jümmer to sehn un to hören. Worrn wi dat, worrn wi
mennigmaal anners över de Lüüd denken. Bolko Bullerdiek hett nu een Book
schreven, sien letzt, as he seggt, mit 54 Geschichten över Lüüd, as Bull se
vör Ogen harr. Un so kiekt wi nu in dat Alldagsleven von den Huusmeister,
över den wi ja all uns egen Menen hebbt. Un denkt na. Un wi lehrt Hotte
kennen, de lange Jahrn as Döörstaher op St. Pauli sien Geld verdeent hett.
So wat in de Aart maakt he nu ook noch – he höllt de Wacht vör de Hütt
bi de St. Pauli-Kark. Dat de Flüchtlinge slapen köönt un nich von
rechte Typen angahn ward. Un wi denkt na. Un nadenken doot wi
ook, wenn wi von een heel besünner Mudder Griepsch höört. Een
Fro, meist ut een anner Tiet, as dat noch Minschen mit een tweet Gesicht
geev un Lüüd, de Woorten bespreken kunnen. Se hett veel Kinner
in’t Leven hulpen, man nich blots. Dor hett se för seten. Een Hex?
Bolko Bullerdiek lett uns in sien lütte Geschichten in veel Schicksale
kieken. Lüüd ut uns Naverschup, Lüüd, över de mal wat in’t
Blatt stahn hett, Minschen ut Kairo un Mailand, welk mit een bekannten,
anner ahn Naam. Mannslüüd vör all. Twee korte Sieden
langt, dat de Schriever een heel Leven vör uns opstahn lett. He
seggt, wat wi weten mööt, dat wi uns een Bild maken köönt. Maken
mööt, denn, un dat tekent disse Geschichten ut, he verknippt
sick een Oordeel över de Lüüd. An’n Ennen steiht foken so wat as:
Is doch nich to faten! Oder: Man wat weet een as ick dor von af.
Ick will Di wat seggen: Fangst du eenmal dat Lesen an, denn
wullt Du dit Book nich wedder ut de Hand leggen. Disse »Allerhand
Slag Lüüd«, de Bolko Bullerdiek Di vörstellt, de wullt Du
all kennen lehren. De ehr Leven röögt Di an. Un twüschendör
bemöttst Du de lütten Skizzen von den Maler Meinhard Raschke,
de mit sien Biller seggt, wat he dor just leest hett, wat em för
Gedanken bi disse Geschichten komen sünd.
Doch ene Geschicht fehlt, een Minsch is in dit Book nich vörstellt
worrn: een Schriever. Den sien Geschicht kunn so gahn:
Een mutt weten, wenn een ophöörn mutt,
hett de Schriever sick seggt, un beslaten: dit
is mien letzt Book. Un wenn he wat seggt,
denn gellt dat ook. Doch denn, eens goden
Daags, liggt op sien Schrievdisch een Stück
Papier – mit een Geschicht. Gediegen.
Anner Week is dor wedder een Vertellen.
Un een paar Daag later noch een.
Nich dat Leven schrifft de Geschichten,
dat deit de Schriever. Un dat is sien Leven.

Bolko Bullerdiek, Meinhard Raschke:
Allerhand Slag Lüüd. Hamburg,
Quickborn-Verlag 2022, 160 Seiten.
ISBN 978-3-87651-486-4

Gerd Spiekermann

Heft Artikel von: Spiekermann, Gerd