Dat schull en heel besünner Veranstalten warrn, dat teihnte Finale vun PLATTSOUNDS, den plattdüütschen Songcontest för junge Musikers ut Neddersassen, an’n 21. November 2020 in Stadthagen. En besünner Veranstalten is dat ok worrn, man vunwegen Corona anners as ploont. Liekers de 14 Deelnehmers, de sik för den Jubiläumscontest anmellt harrn, nu nich in’t Kulturzentrum »Alte Polizei« op de Bühn stahn kunnen un allens online stattfinnen müss, weer dat PLATTSOUNDS -Finale, dat een an’n 21. November live in’t Nett beleven kunn, bannig interessant un spannend. Se hebbt dat würklich henkregen, en Deel vun de grootoordige Stimmung, de een de verleden Johren bi de Afslussveranstalten vör Oort spören kunn, in dat Online-Finale to överdregen. En groten Andeel doran harr Annie Heger, de jüst as in de anner Johren ok düt Finale op ehr lebennige lockere Oort modereert hett, dütmol vun tohuus ut ehr Köök. Se wüss to jeedeen Band oder Musiker*sche wat Besünners to vertellen. So wörr dat Publikum tohuus nich blots vun de Musik allerbest ünnerholen. De Deelnehmers präsenteren sik un jümehr plattdüütsche Songs per Video. Dat harr jeedeen opnohmen as he oder se dat man kunn. Dor geev dat allens vun Biller vun de Musikers, de een bi een to de Musik wiest worrn, bet to mit professchonelle Hölp produzeerte Videoclips. Man de Qualität vun dat Video schull jüst keen Kriterium för de Jury ween, de as jeedeen Johr de dree besten plattdüütschen Songs utteken schull. Vun de Jury, de sünst jümmers blots kort vörstellt wörr un denn achter de Kulissen verswunn, kreeg een düt Johr wat mehr to sehn un sünnerlich to hören. Annie Heger höll twüschendrin mit jeedeen vun de veer Jurymaten en lütten Klöönsnack. Ilka Brüggemann vun’n NDR Radio Neddersassen hett al 2017 in Celle in de PLATTSOUNDS -Jury seten. Se betoon de Rull vun Plattdüütsch in’e Medien un meen, in Neddersassen geev dat al’n helen Barg. Wichtig weer, dat op Platt över all Themen snackt warrt un nich blots över Platt. De Singersche un Schauspelersche Denise M’Baye, de al in de een oder anner Feernsehreeg to sehn weer un en Reeg Sproken snackt, weer heel ut de Tüüt, wo sexy dat Plattdüütsche ween kann. De Musiker, Singer un Kunstmoler Jakobus Durstewitz meen, een müss mit junge Lüüd Platt snacken, anners deen se dat nich lehren. Stefan Meyer vun’e Ollenborgsche Landschop weer vun’e eerste Stünn an bi PLATTSOUNDS dorbi. He harr den Wettstriet vör 10 Johren tohoop mit Matthias Kahrs un Thorsten Börnsen in’t Leven ropen un keek nu op düsse Tiet torüch. En Vörbild weer de europäische Wettstriet »Liet International« west. Dat is en Grand Prix för moderne Bands, de in lütte Sproken singt. Se wüssen nich, wat dat ok op Platt funktschoneren wörr un sik överhaupt Lüüd mellen wörrn. Denn kemen toeerst de Death Metal-Bands, bi de een vun de Sprook mehrsttiets nich alltoveel verstohn kann. Man dorno mellen sik ok de Rapper, un anner Musikrichten as Punk un Rock kemen dorto. So gifft dat jümmers en bunten Struuß an verscheden Bidrääg. Se wüllt sünnerlich ok de jungen Lüüd ranholen, de betto noch nich Platt snackt. Un ok wenn de denn blots een Song op Platt mookt, hebbt se de tominnst al mol de Sprook in’t Muul packt. Foken kriegt se vun de Bands loter to weten, dat dat Publikum op Kunzeerten lever de plattdüütsche Version vun den Song hören will.
Ok düt Johr weren wedder en Barg verscheden Musikrichten dorbi, 14 niege plattdüütsche Songs vun junge Musikers. Liekers dat wiss nich licht weer, dor de besten dree vun ruttosöken, kunn sik de Jury denn doch gau enig warrn un verkünn no en korte Paus mit Musik vun »Lighthouse Down«, de 2016 op Platz dree lannt weren, wokeen den PLATTSOUNDS Songcontest 2020 wunnen hett:
Op den drüdden Platz keem de Band »Mountain River« ut Bruunswiek mit »Sett di daal, (mien) Söte» un kunn sik över 800 Euro freien. Twete wörr de »1918 Hafenbande« ut Rodenborg/Wümm mit jümehrn »Hafenwave«-Song »Keen Meer to wiet«. Se kregen 1100 Euro. Bi den Wettstriet PLATTBEATS vör üm un bi twee Maanden weren se mit densülvigen Song blots op een vun de achtersten Plätzen lannt. Ümso grötter weer nu de Överraschen över düssen tweten Pries. Den eersten Pries vun 1500 Euro kreeg de Band »Majanko« ut Willemshoben. Jümehr Pop-Indie-Song »Wies« wörr dat Plattdüütsche Leed vun’t Johr 2020. Dorto köönt se ok noch bi’t Semifinale von den Local Heros Bandcontest 2021 mitmoken. Bi’t Afstimmen in’t Nett för den Publikumspries legen twee Bands mit liekveel Punkten vörn: »Stepdragon« ut Bad Bämsen un »Razor Punch« ut Wanna. Se kregen nu beid den Pries vun 300 Euro. As Ünnerstütten för de jungen Künstlers in de Coronatiet hebbt de Veranstalters op de Priesen ut de Vörjohren nochmol de Hälft roppackt un ok de Deelnehmers, de keen Pries wunnen hebbt, kregen al mol 100 Euro för’t Mitmoken.
Dat hele Finale hett so bi tweeunhalf Stünnen duert, jüst so as sünst ok. Un een harr würklich dat Geföhl, een weer direktemang dorbi. Dat de een oder anner mol vergeten hett, dat Mikro intoschalten, dröög dor ok noch to bi. Blots de Applaus un de gode Stimmung vun’t Publikum hebbt doch fehlt. De Bands harr ik ok lever op de Bühn beleevt. Un to’n Danzen harr ik so alleen för’n Reekner denn ok keen Lust. Dorför müss nüms jichtenswo henfohren. So harrn denn en Barg mehr Lüüd de Chance, dorbi to ween. As op de Nettsteed vun PLATTSOUNDS to lesen weer, schüllt dor üm un bi 700 Lüüd tokeken hebben. De Veranstalters hebbt würklich dat Beste ut de Situatschoon mookt un dat is bannig goot glückt. Keen mag, kann sik all de Videos op de Nettsteed oder den Youtube-Konol vun PLATTSOUNDS nochmol ankieken. Woneem dat Finale 2021 stattfinnen schall, stünn to de Tiet noch nich fast. Wenn dat ok tohuus mit’n Glas Wien vör’n Reekner heel kommodig weer, hoop ik doch, dat denn all wedder tohoopkomen köönt. Live in’t Nett överdregen kann een dat jo villicht liekers.
Dat ji seht, wat för gode plattdüütsche Texte dor wedder bi weern, kriegt ji hier den Text vun mien persöönlichen Favoriten, de »1918 Hafenbande«, to lesen:
Keen Meer to wiet
Ik höör diene Stimm noch, se klingt noch an‘n Pier,
wi hebbt uns domals noch draapen, ik see: „Bliev doch hier!“
Man dat geiht nich, ne, dat geiht nich.
Du seggst, du musst gahn, du büst in Gefohr,
se seggt, du dörvst hier nich blieven, dien Schipp is al kloor.
Dat weer de schöönste Steed up de Welt,
man düsse Tiet gung veel to snell.
Dat is egal, wo wiet du föhrst.
Dat is egal, wat för uns liggt.
Ik will nich länger op di töven,
nich länger mehr düt Leven.
Dat is egal, wo wiet du föhrst.
Dat is egal, wat för uns liggt.
Keen Graav so breet, keen Muer so hooch,
ik glööv, wi süht uns, du un ik.
As du dröömt hest an‘n Morgen, do hebb ik di küsst,
du hest faken seggt, dat so veel anners warrn müss,
man dat güng nich, ne, dat güng nich.
Wi warrt uns weer drapen, wo ok ümmer du büst,
un wenn dat weer Dag warrt, will ik, dat du mi küsst.
Dat warrt de schöönste Steed up de Welt, wenn kene Grenz se mehr verstellt.
Dat is egal, wo wiet du föhrst.
Dat is egal, wat för uns liggt.
Ik will nich länger op di töven,
nich länger mehr düt Leven.
Dat is egal, wo wiet du föhrst.
Dat is egal, wat för uns liggt.
Keen Graav so breet, keen Muer so hooch,
ik glööv, wi süht uns, du un ik.
Se buut Grenzen un Muern
üm jeedeen Land,
man keeneen warrt duern,
se buut se up Sand.
Dat is egal, wo wiet du föhrst.
Dat is egal, wat för uns liggt.
Ik will nich länger op di töven,
nich länger mehr düt Leven.
Dat is egal, wo wiet du föhrst.
Dat is egal, wat för uns liggt.
Keen Graav so breet, keen Muer so hooch,
ik glööv, wi süht uns, du un ik.
___________________________________________
Twee Minschen, de sik leev hebbt, man doch nich tohoop blieven köönt, vunwegen Grenzen, de twüschen jüm staht. Dor kann een över nodenken, wat för en Situatschoon, wat för Grenzen dat sachts ween möögt. Mööglichkeiten gifft dat veel hütigendaags. De Wöör laat di nodinken, wat de politische Situatschoon jichtenswo för enkelte Minschen bedüden kann, dat dat nich blots Norichten sünd. Man de Song lett hopen, dat Grenzen överwunnen warrn köönt, dat Muern nich op ewig stahn blievt. En Hopen, dat Lüüd drifft, as an verscheden Steden vun düsse Welt to sehn is.
De Text is bi mi hangen bleven, jüst so as de Musik, de ik al wedder in’t Ohr heff, wieldes ik düt schrieven do. De klingt beten no den Synthiepop ut de Tachentiger. Mag ween, dor hett dat wat mit to doon. Kiekt un höört jo man dat Video an!
Heft Artikel von: Kücklich, Petra