Dat Billerbook för Kinner vun dree bet teihn Johr is mit de fienen Biller vun
Ivan Hutsul en besünnern Henkieker. So fien tekent, een meent, de Blöder
an’n Boom to kennen. De Blomen un Deerten so un so. Schafgarbe, Lüchtmoos,
dat reten Holt an’n Tuun, dat blanke Fell vun ’t Kalf. Wunnerschöön.
Meta is en Koh mit en opfallen lange, witte Lock an de Steern. Na en Malöör
mit den Veehtransport, haut se af. Se blifft över Nacht in ’t Holt, kummt to
anner Kööh op de Wisch, warrt wegjogt un findt an ’t Enn en nee Tohuus.
De Geschicht hett Hildegard Tölke so schreven, dat sik dat jümmer an ’t
Enn vun twee Regen riemelt. Man dat is keen Gedicht, is en Leeshölp. Maakt
dat Münsterlänner Platt ingängig. Grote klore Schrift, rechts- oder linksbündig
anornt, geevt de Sieden en gefällig Ansehen. De Biller ragt jümmer
so fief Zentimeter na de Textsiet röber. En farbigen Pinselstreek is de Verbinden
(oder Trennen) vun Bild un Text. Op de letzt söben Sieden warrt de
Geschicht in twintig Strophen vun je veer Regen noch mal vertellt. To’n Mitsingen,
na de Melodie vun Meister Jakob (Bruder Jakob). Hebbt Kinner seker
ehrn Spoß an. So goot mi dat Book ok gefallt, de Fehler bi de Satzteken (S.
4, 11, 24) un en Grootbookstaav, wo en lütten henhöört (S. 7), sünd argerlich.
Un denn is dor Meta, de sik op Siet 3 vörstellt: »Ik bin Meta, eine Kauh […].«
Man op Siet 8 heet dat: »Do hört se wat van baoben …«. Vun dor an blifft dat
denn bi dat Vertellen ut Sicht vun en Tokieker. Schaad.
Hildegard Tölke: Meta büxt ut, Bilderbuchgeschichte auf Plattdeutsch,
Illustration Ivan Hutsul. Lohne: Selbstverlag Hildegard Tölke 2022, 40 Seiten,
Querformat 28,9 x 21, ISBN 978-3-00-072090-1
Christl Twenhöfel
Heft Artikel von: Twenhöfel, Christl