An’n 20. Oktober 2018 weern över 300 Lüüd in’t Zollhaus no Leer komen. Se freien sik op Rock, Reggae, Singer-Songwriter, Hip-Hop un Metal op Platt un wullen beleven, keen vun de ölven Bands un Musikers, de 2018 in’t Finole vun’n Plattsounds-Bandwettstriet komen sünd, nu vun de Jury för de dree eersten Priesen utsöcht woorn. Alltohoop 20 Deelnehmers harrn sik düt Johr bi Plattsounds beworven. Dat weer de tweethööchste Tall siet dat Plattsounds överhaupt gifft, un dat deit dat al siet 2011.

To’n Opwarmen spelen eerstmool „De Winnewupps“, Winner vun Plattsounds 2017, jüm ehrn Siegertitel „De Winnewupp“ un en Rock-Metal-Version vun „Danz op de Deel“. Dor keem de Avend al ingang un de Stimmung weer allerbest.

(links: De Winnewups ut Rodenkirchen bi Ollnborg.)

Dör den Avend un över männicheen Ümbupaus weg föhr as in’e verleden Johrn Sängersche Annie Heger op ehr frische humorvulle Oort.

No en Begröten vun Landrat Matthias Groote op Platt stell se de Jury vör.

 

 

 

Dat weern (vun links) de Sängersche Isina Lüschen, de Journalist Frank Jacobs, de ok för’n NDR Radio Neddersassen warkt, Ingo „Käpt’n“ Frieling vun Radio Ostfreesland, woneem dat in’e Week elkeen Dag to Middagstiet en hele Stünn Radio op Platt gifft, Stefan Meyer, Referent för Plattdüütsch bi de Ollnborgsche Landschap, un Johann Saathoff, Liddmaat vun’n Bunnesdag. De Jury wull blangen den Text ok op de Musik, den Optritt op’e Bühn un den Kuntakt to’t Publikum achten, un wat de Song de Schangs hett, en Hit to warrn.

Johann Saathoff (in’e Mitt) kreeg en Extra-Applaus för de Reed op Platt, de he in Märzmaand in Bunnesdag holen hett.

 

 

 

 

 

 

Denn güng dat ok al los mit de eerste Band.

De Rull as „Iesbrekers“, as eerste Band in’n Wettstriet, harrn „Apollo Circus“ ut Emmen. De Sänger proot Platt un op de Froog no’n besünnern Wunsch meen he, se wullen geern mol in’n Bunnesdag spelen. Ehr Leed „Jo jo jo“ geiht los as Reggae man warrt denn doch noch orrig rockig.

 

Mit Jan un Ole vun de Band „1918 Hafenbande“ ut Rotenborg an’e Wümme, to de fief Jungkeerls toheurt, kunn Annie Heger sogor beten Platt snacken. In Rotenborg snacken noch vele Lüüd Platt, vertellen se. De Band is ut twee Bands tohoopstellt worrn. Een dorvun weer de Shantychor Lunzburg, de al mol bi Plattsounds dorbi weer. Jümehr Musik nömen se ShipHop, en Kombinatschoon ut Shanty un HipHop. De Song „De rooden Matrosen“ hett den Matrosenopstand vun 1918 in Kiel as Thema un lett hoog över’n Hamborger Michel en Fahn mit Anker un Sichel weihen.

De Singer-Songwriter Paul Sander ut Jesteborg weer de eenzige Solomusiker an düssen Avend. He lehrt Platt mit Hölp vun „Hör mal beten to“ un stimm mit sien „Winterleed“ al op de kole Johrstiet in.

 

 

 

 

 

Ut Uelzen kemen „The Manic Foxes“ mit de Sängersche Manu (2. v. links) un veer Jungkeerls, een dorvun ut Hamborg. Se moken en Mix ut Funk, Stoner un Alternative Rock un menen, Platt is scheun antoheuren un verbinnt. Villicht kunnen se ehr Musikricht ok Vossrock nömen. De Song heet al mol „De Vosssong“.

 

De „Village Idiots“, op Platt Dörpdööspaddels, ut Breinermoor weern al 2017 in Celle dorbi un süngen düt Johr vun den „Klüterbaas“, de allens, wat twei is, wedder trecht kriggt.

 

 

Janis (in’e Mitt) vun de Band „Jenkin’s Porcupine“ ut Rehden bi Diepholz singt ok as Tenor un geev en lütte Kostproov mit „De eerste Lark“. Man wat de Band düssen Avend aflever, weer vun’n heel annern Slag.

 

 

Dat Duo „DJ Dicker Junge feat. Fabipositas“ ut Cloppenburg keem mit jümehrn Elektro-Song „Fett“. Daniel weer al 2016 mit de Band Neonhandz bi Plattsounds dorbi west.

 

 

Ut Lümborg keem de Band „Sgt. Cooper“. De Text vun jümehrn Rocksong „BoB“ lett een en beten grugen. Man alltoveel kunn een – as bi vele anner Bands ok  – op de Bühn dor nich vun verstahn.

 

 

Bi den Melodic MetalCore-Song „Maak dat good“ vun „Enfeeble“ ut Lingen kunn een vun den Text meist gor nix mehr verstahn. Man dorför hebbt se bi’t Publikum för orrig Stimmung sorgt. De Vörjohrssieger „De Winnewupps“ stünnen in’e eerste Reeg vör de Bühn un danzen orrig mit.

 

„Whale in the Desert“ kemen ut Buxthuud, man kennenlehrt hebbt se sik in Neuseeland. In’e Band sünd Lüüd ut veer Länner mit bi: Russland, Polen, Äthiopien un Düütschland. Mit de Anmarken, Platt heur sik doch jichtenswo poetisch an, harrn se de Harten vun’t Publikum foorts wunnen. Bi’t Översetten vun jümehrn Song „Överdrift“ bruken se de Hölp vun Oma. Annie Heger sä denn eerstmol heel velen Dank an all Omas un Opas, de bi de plattdüütschen Texten mithulpen hebbt.

Bi den Heavy Rock vun „Redestruction“ ut Leer un ümto wöör dat nochmol orrig luut. Wiel se beten laat an’e Tour weern, müssen se ahn Proov un Soundcheck spelen. Hett liekers goot klappt.

 

 

Wieldes de Jury nu utklamüstern dä, wokeen de Priesen kriegen schull, kunn sik dat Publikum an de Musik vun Gerrit Hoss un Band freien. Dor weer dat meist schood, dat se sik teemlich gau eenig worrn sünd.

 

 

Vunwegen den moien Text un den Optritt alltohoop kreeg „Whale in the Desert“ ut Buxthuud den drüdden Pries. För dat Priesgeld vun 300 € wullen se en EP opnehmen.

 

Sünnerlich för den „fetten Bandsound“ kreeg „Enfeeble“ ut Lingen den tweten Pries vun 600 €.

 

Den eersten Pries schull Rico Mecklenburg, Präsident vun’e Ostfreessche Landschap övergeven. Man de leet sik Tiet, bedank sik eerstmol bi de Organisatoren un all, de mitmookt hebbt, un verdeel Geschenken an de Jury.

Man denn weer’t sowiet un „Apollo Circus“ ut Emmen kunnen sik över den eersten Pries: 1000 € un en Platz in’t Semifinale vun den Local Heroes Bandcontest freien. Sünnerlich de feinen Riemels un moien Wöör in’n Text un dat coole Outfit harrn de Jury övertüügt.

 

Den Publikumspries vun’t Internetafstimmen harr de Band „Goodwill Intent“ wunnen. 36,6 % vun de 1784 Lüüd, de bi dat Afstimmen mitmookt harrn, harrn jüm ehr Stimm geven.

To’n Afsluss spelen „Apollo Circus“ nochmol dat Siegerleed.

 

 

 

Un denn sammeln sik all för’t Gruppenfoto.

 

 

 

Dat weer wedder en Avend, de sik lohnt hett, mit heel gode Stimmung un vele verschedene interessante Bidrääg vun de Bands ut heel Neddersassen.

Dat Plattsoundsfinole 2019 schall an’n 09.11.2019 in’n „Alten Schlachthof“ in Stood (Stade) ween. Dor kann een sik bet to’n 22.09.2019 för bewarven ünner plattsounds.de/mitmachen

Bericht un Fotos: Petra Kücklich