„Op de Reeperbahn“ heet de nie’e CD vun de Tüdelband. Dat is nu al de drüdde. Un ji bruukt wiss nich bang ween, dat se nu in’t Shanty-Fack wesselt sünd. Dat Titelstück „Op de Rreeperbahn“ is en nie’e Opnohm vun dat ole Hans-Albers-Stück in’n Tüdelband-Sound un mit’n plattdüütschen Text. Un dat Besünnere: Dat is de „emanzipeerte“ Verschoon vun’t Thema! Dor geiht denn en Deern över de Reeperbahn un söcht sik’n lütten Leevsten – bet morgens Klock teihn. Denn gifft dat noch en nie’e Opnohm vun de – ik wörr meist seggen – „Tüdelband-Hymne“ vun den smucken Uwe, de man – so’n Schietdreck – op Jungs steiht. Een hoochdüütschet Stück is op de CD ok op. Man dat kann een ok vergeven, wieldat dat so’n charmante Leevsverkloren an Hamborg is. Butendem finnt sik op de CD noch dree nie’e plattdüütsche Leders no beste Tüdelband-Oort mit nadenkern Texten, de een ok goot verstohn kann, un bannig goot antohören. In „Vagels in’n Wind“ geiht dat dorüm, in’n Ogenblick to leven. Dat Leed „So as du büst“ is en wunnerschöne Inloden: „Wenn du magst, kannst du mi rohig neger kamen, ….., so as du büst.“ Wokeen müch nich so annohmen warrn, as he (oder se) is? De Titel vun’t letzte Leed „To gau leevt“ warrt in de hoochdüütsche Översetten, de in dat lütte Heft bi de CD dorbi is, mit „Zu schnell geliebt“ översett. Männicheen Plattdüütschen wörr dat sachts ehrder mit „gelebt“ översetten. Mit dat „lieben“ is dat in’t Plattdüütsche jo so’n Sook. Dat heet denn meist „leev hebben“ oder „lieden mögen“. Man dat harr hier nich so recht passt. Un se sünd jo in gode Sellschop. Al in Friedrich Hans Schaefer sien „Faust“-Verschoon seggt Marthe Schwerdtlein: „Wi hebbt uns leevt, worraftig leevt!“. Mit blots söss Stücken is düsse CD bannig wat kötter as de dorvör, op de dörteihn Leders op sünd. Dat dücht meist so, as harrn de jungen Lüüd noch bannig wat anners ümme Hannen, wat een sachts nich verwunnern dröff. So hett de Sängersch Miriam Buthmann to’n Bispill ok noch en Leed för den Karkendag schreven. De CD is goot antohören un dat eerste Mol gifft dat ok en hoochdüütsche Översetten to de Texten. So is se ok grod Platt- un Tüdelband-Instiegers antoroden.

Die Tüdelband. Op de Reeperbahn. To kriegen bi www.plattschapp.de

Heft Artikel von: Kücklich, Petra